काठमाडौँ –प्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले सुदूरपश्चिम प्रदेशका मुख्यमन्त्री कमलबहादुर शाहलाई विश्वासको मत दिन पार्टीका प्रदेशसभाका आफ्ना सांसदहरूलाई निर्देशन दिएका छन् ।

सुदूरपश्चिम माओवादी संसदीय दललाई आइतबार पत्र पठाउँदै अध्यक्ष प्रचण्डले शाहलाई विश्वासको मत दिएर अहिलेको सरकार जोगाउन निर्देशन दिएका हुन् ।

केन्द्रमा बनेको नयाँ गठबन्धनअनुसार काम गर्न पनि प्रधानमन्त्री प्रचण्डले प्रदेश संसादहरूलाई निर्देशन दिएका हुन् ।

‘केन्द्रमा एउटा समीकरण बन्ने तर प्रदेशमा त्यसअनुसार काम नहुने भन्ने हुँदैन । सत्ता साझेदारी लगायतका विषयमा पछि कुरा गर्दै अहिले विश्वासको मत दिनुस्’, प्रदेश सांसदलाई अध्यक्ष प्रचण्डले लेखेको पत्रमा भनिएको छ ।

मुख्यमन्त्री शाहले आजै प्रदेश सभामा विश्वासको मत लिँदै छन्। माओवादीले मत दिएमा शाहले विश्वासको मत पाउने छन् । ५३ सदस्यीय प्रदेश सभामा कांग्रेसका १९, माओवादीका सभामुखसहित ११, नागरिक उन्मुक्ति पार्टीका ७,  नेकपा (एकीकृत समाजवादी) ४ जना र राप्रपाका १ सांसद छन् । प्रदेश सभामा एमालेका १० सांसद छन् ।

बहुमतका लागि २७ सांसदले विश्वासको मत दिनुपर्छ । माओवादीले मत दिने भएसँगै मुख्यमन्त्री शाहले विश्वासको मत पाउने पक्का छ ।

सुदूरपश्चिमका माओवादी संसदीय दलका नेता खगराज भट्टले केन्द्रबाट विश्वासको मत दिन निर्देशन आएको र प्रदेशको संसदीय दलको बैठक बसेर आधिकारिक निर्णय गर्ने बताए । 

नेकपा (एमाले) बाट मुख्यमन्त्री बनेका राजेन्द्रसिंह रावलले विश्वासको मत नपाएपछि माघ २६ गते उनको सरकार ढलेको थियो । सोही दिन प्रदेश सभाको सबैभन्दा ठूलो दल नेपाली कांग्रेसको संसदीय दलका नेताको हैसियतमा शाह मुख्यमन्त्री नियुक्त भएका थिए ।