पोखरा– नेपालको पर्यटकीय नगरी पोखरा । पोखराको पनि लेकसाइड पर्यटकको केन्द्र । आज यहाँ रहेका विभिन्न देशका पर्यटक होलीको रङमा रमाएका छन् ।
होली नेपाली परम्पराको रङको पर्व । आपसमा रङ खेलेर यो पर्व मनाउने गरिन्छ ।
विभिन्न रङमा रंगिएर नाचगान गर्दै रमाएका नेपालीसँग मिसिन पुग्छन् विदेशी पर्यटक पनि । विदेशी पर्यटक पनि आज यहाँ नेपालीसरह नै रङमा रमाए । निकै खुसी हुँदै विभिन्न रङ लगाउँदै होली खेले ।
रेस्टुरेन्ट एन्ड बार एसोसिएसन रेवान पोखराले फागु पूर्णिमाको अवसरमा आयोजना गरेको होली महोत्सव कार्यक्रमा विभिन्न देशका ५०० भन्दा बढी पर्यटकले एकअर्कामा रङ लगाएर रमाएका थिए ।
होलीको रङसँगै रमाइरहेका जर्मन नागरिक मरियसले यो विशेष दिनले निकै खुसी दिएको बताए । ‘निकै खुसी लागेको छ, पोखरामा आएर रङसँग रमाउन पाउँदा आनन्द पनि लागेको छ । सबै जनालाई खुसी देखेको छु,’ उनले भने ।
‘यहाँ कसैले को कहाँबाट आएको र को कुन धर्म मान्ने भनेर कसैले सोधेनन् । सबैले सबैलाई सम्मानपूर्वक रङ लगाइदिए । मलाई यो समानता निकै मन पर्यो,’ उनले होलीलाई विभेदरहित पर्वको पनि सङ्ज्ञा दिए ।
उनीसँगै रहेका अर्का जर्मन नागरिक डेनियलले पनि रङसँग खेल्दा तनावको अनुभूति नभएको, बडो रमाइलो अनुभूति भएको प्रतिक्रिया दिए ।
अन्नपूर्ण बेस क्याम्प जान आएका डेनियलले आजको दिनले ऊर्जा थपेको र खुसी बढेको अनुभव सुनाए । आफूलाई निलो रङ एकदम मन पर्ने भन्दै उनी सोही रङसँग निकै रमाए । आफूले पनि रङ दले भने अरूलाई पनि लगाइदिए ।
त्यसैगरी ३ हप्ताअघि बेल्जियमबाट नेपाल आएकी लिसाले पनि रङसँग रमाएको आजको दिन जीवनमा यादगार हुने बताइन् ।
लमजुङको बेँसीसहरको एक स्कुलमा स्वयंसेवीका रूपमा काम गर्दै आएकी उनी पोखरा घुम्न आउँदा रङसँग रमाउन अवसर मिलेको बताइन् ।
‘म खुसी छु, जीवनको पहिलो अनुभव हो यो । रङसँग रमाएको यो अवसरका लागि सबैलाई धन्यवाद,’ लिसाले भनिन् ।
इलामको चियाबारे अध्ययनका लागि नेपाल आएकी होल्यान्डकी एल्काले पनि रंगीविरंगी रङमा रमाउँदा निकै आनन्द र खुसी लागेको प्रतिक्रिया दिइन् ।
उनले हरेक देश र नागरिकको आआफ्नो संस्कार र संस्कृति हुने र एकअर्काले त्यसको सम्मान गर्न सके खुसी मिल्ने बताइन् ।
उनले रेवानले आयोजना गरेको कार्यक्रमले विभिन्न देशका नागरिक एकै ठाउँमा हुने अवसरसमेत प्रदान गरेकामा खुसी व्यक्त गरिन् । .
रेवान पोखराका कार्यवाहक अध्यक्ष विश्वराज पौडेलले रेवानले हरेक वर्ष फागु पूर्णिमा होली विशेष महोत्सव गर्दै आएको र यस वर्ष पनि विदेशी पर्यटकको उल्लासमय उपस्थितिका लागि कार्यक्रम गरेको बताए ।
‘कोरोना महामारीपछि यो वर्ष पर्यटकको उल्लासमय उपस्थिति रह्यो, विदेशी पर्यटक एकअर्कालाई रङ दलेर आत्मियता र माया साटिरहेको हामीले पायौँ । यो हाम्रो संस्कृतिप्रतिको सम्मान हो,’ पौडेलले भने ।
हरेक संस्कार संस्कृतिको आआफ्नै महत्व हुने र त्यसको महत्व उजागार गर्न सके पर्यटन प्रवद्र्धनमा भूमिका खेल्ने उनको भनाइ थियो ।
उनले पर्यटन प्रवद्र्धनका लागि रेवानले सांस्कृतिक र धार्मिक, सामाजिक पक्षलाई समेत ध्यान दिएर विभिन्न कार्यक्रम गर्दै आइरहेको र त्यसमा विशेष गरी विदेशी पर्यटकलाई लक्षित कार्यक्रममा जोड दिएको बताए ।
महोत्सव पोखराको लेकसाइडको अम्बोटबाट हल्लनचोकसम्म पञ्चेबाजासहित पर्यटन व्यवसायी, आन्तरिक तथा बाह्य पर्यटक विभिन्न संघसंस्थाका प्रतिनिधिको उपस्थितिमा र्याली निकालिएको थियो ।
रेवानका महासचिव विकास भट्टराईले होलीका क्रममा हाम्रो देशको संस्कृति जानकारी दिन सकियोस् भनेर पञ्जेबाजाका साथै अन्य नाचगान पनि गरिएको उनले बताए ।
