काठमाडौँ– आइसिसी विश्वकप लिग–२ क्रिकेटयूएईविरुद्ध नेपालले रोमाञ्चक जीत दर्ता गर्दै महत्त्वपूर्ण २ अंक बटुलेको छ ।
दुबई अन्तर्राष्ट्रिय क्रिकेट स्टेडियममा आजको खेलमा घरेलु टोलीविरुद्ध ४२ रनको जीत दर्ता गर्दै नेपालले महत्त्वपूर्ण २ अंक बटुलेको हो । यससँगै नेपाल ३२ अंकका साथ तालिकाको पाचौं स्थानमा उक्लिएको छ ।
आजको जीतले नेपाल आईसीसी क्रिकेट विश्वकप लिग टुको शीर्ष ३ मा पर्ने सम्भावना जीवित राखेको छ ।
निर्धारित ५० ओभरमा नेपालले ८ विकेट गुमाउँदै २२९ रनको योगफल तयार पारेको हो । नेपालका लागि भीम सार्कीले ७० रनको अर्धशतकीय इनिङ खेले भने आरिफ शेखले ४३ रनमा अविजित रहे ।
यस्तै, सन्दीप लामिछाने २७ रन बनाएर आउट हुँदा करण केसी १७ रनमा आउट भए भने प्रतिश जिसी ११ रनमा अविजित रहे ।
त्यसअघि ६८ रनमा ५ विकेट गुमाएको नेपाललाई सन्दीप र भीम सार्कीले छैटौँ विकेटका लागि ५६ रनको साझेदारी गरे ।
त्यसैगरी, आरिफसँग भीमले ७ औँ विकेटका लागि ५६ रनको साझेदारी गर्दै नेपालको इनिङ समानजक अवस्थामा पुर्याएका थिए। अन्य ब्याटरहरूले भने गतिलो स्कोर बनाउन सकेनन् ।
यूएईलाई लक्ष्यसम्म पुग्न नदिने क्रममा दीपेन्द्रसिंह ऐरी र सोमपाल कामीले शानदार बलिङ गरे । युएईलाई १८७ रनमा समेट्ने क्रममा नेपालका दीपेन्द्र सिंह ऐरी र सोमपाल कामीले समान ३/३ विकेट झारे ।
त्यसैगरी,आरिफ शेख, करण केसी र सन्दीप लामिछानेले समान १/१ विकेट लिए ।
युएईका लागि ओपनर मुहम्मद वासिम शून्य रनमा आउट भएका थिए भने अर्का ओपनर आसिफ खानले ८२ रनको योगदान दिए । त्यसैगरी आर्यन लाक्राले ५० रन जोडे भने वृत्य अरविन्दले १३ रन बनाए । त्यसबाहेक अन्य ब्याटरले दोहोरो अङ्कमा रन बनाउन सकेनन् ।
अब नेपालमा हुने ४ खेलमा जीत निकाल्न सके नेपाल शीर्ष ३ मा परेर सिधै विश्वकप क्वालिफायरमा पुग्ने छ भने थप २ जीत दर्ता गर्दा १ दिवसीय मान्यता जोगिने छ ।
