तेहरान– इरानका सर्वोच्च नेता अयातुल्ला अली खामेनीले हालैका महिनाहरूमा छात्राहरूविरूद्ध विषाक्त पदार्थ प्रयोग गर्नेलाई ‘कडा सजाय’ दिनुपर्ने बताएका छन् ।

इरानका ५२ भन्दा बढी विद्यालयमा गत नोभेम्बरको अन्त्यदेखि अहिलेसम्म ग्यास विषाक्तताका सयौं घटना भएका छन् ।

छात्राहरूले ‘अप्रिय’ वा ‘अज्ञात’ गन्धपछि सास फेर्न गाह्रो हुने, वाकवाकी लाग्ने र चक्कर लाग्ने जस्ता लक्षणहरू देखा परेको बताएका छन् । यसले आमाबाबुमा डर पैदा गरेको छ । घटनाप्रति चिन्ता व्यक्त गर्दै सर्वोच्च नेता खामेनीले अधिकारीहरूलाई आक्रमणकारी समूहविरुद्ध तत्काल कारबाही गर्न गर्न आग्रह गरेका छन् । 

‘यदि विषाक्तता प्रमाणित भयो भने, यो अक्षम्य अपराध हुनेछ र अपराधीहरूलाई कडा सजाय दिनुपर्दछ,’ खामेनीले रहस्यमय विषाक्तताको बारेमा आफ्नो पहिलो सार्वजनिक भनाइमा उल्लेख गरेका छन् । 

न्यायपालिकाका प्रमुख घोलामहुसेन मोहसेनी एजेईले सोमबार विद्यालयका छात्रालाई विष खुवाएको आरोपमा पक्राउ परेका व्यक्तिलाई ‘जन्मभूमिविरुद्धको भ्रष्टाचार’ अभियोगमा मुद्दा चलाइने बताएका छन् ।

इरानी अधिकारीहरूले अहिलेसम्म कसैलाई पनि पक्राउ गरिएको घोषणा गरेका छैनन् ।

आइतबार राति इरानी राष्ट्रपति इब्राहिम राइसीले विषाक्तताका कारण केही बालिकालाई अस्पताल भर्ना गरिएको घटनाको निन्दा गर्दै इरानका ‘शत्रुहरूको नयाँ षडयन्त्र’ भएको बताएका छन् । 

उनले विद्यार्थी, बालबालिका र उनीहरूका अभिभावकको मनमा डर पैदा गर्ने उद्देश्यले यस्तो कदम चालेको उल्लेख गरे । 

यसैबीच, अधिकारीहरूले कोमन्यूज वेबसाइटका लागि विषाक्त आक्रमणको रिपोर्टिङ गरिरहेका इरानी पत्रकार अली पोर्तबाटाबेईलाई सोमबार पक्राउ गरेको एतेमाद पत्रिकाले जनाएको छ ।
तेहरानको दक्षिणमा रहेको कोम सहरमा गत नोभेम्बरको अन्त्यमा विषाक्तताको पहिलो घटना भएको बताइएको छ ।

पूर्वी सहर कुचानमा सोमबार दर्जनौं छात्राले ‘अप्रिय गन्ध’को महशुस गरेको केहीबेरमा स्वास्थ्य समस्या आएको र उनीहरूलाई अस्पताल लगिएको थियो । आइतबार दक्षिणपश्चिमी प्रान्त खुजेस्तानमा ७०० भन्दा बढी यस्तै घटना भएको इटेमादले जनाएको छ ।

गत हप्ता उपस्वास्थ्यमन्त्री युनेस पानाहीले बालिकाको शिक्षाको अधिकारलाई बञ्चित गर्ने उद्देश्यले आक्रमण गरिएको बताएका थिए ।