मनाङ– यहाँ आउने पर्यटक तथा स्थानीयबासीको सहजताका लागि अन्नपूर्ण क्षेत्र संरक्षण आयोजना (एक्याप)ले निःशुल्क सेवा प्रवाह गर्दै आएको छ ।
अन्नपूर्ण पदमार्गमार्फत आउने पर्यटक तथा स्थानीयबासीलाई निःशुल्क स्वास्थ्य सेवा प्रवाह गर्दै आएको अन्नपूर्ण क्षेत्र संरक्षण क्षेत्र आयोजनाले जनाएको छ ।
लेक लाग्ने, अन्य विभिन्न रोगसम्बन्धी आयोजनाले निःशुल्क सेवा प्रवाह गर्दै आएको हो ।
विशेष गरी मनाङ भ्रमणमा आउने पर्यटकमा लेक लाग्ने समस्या बढी हुने भएकाले स्थापनाकालदेखि नै एक्यापले निःशुल्क स्वास्थ्य सेवा प्रवाह गर्दै आएको एक्यापका स्वास्थ्य शाखा प्रमुख लक्ष्मी अर्यालले जानकारी दिए ।
उनका अनुसार चालु आर्थिक वर्ष आन्तरिक तथा बाह्य गरी ९९५ जनाले स्वास्थ्य सेवा लिएका छन् ।
चालु आवको साउनदेखि पुससम्मको अवधिमा एक्यापबाट स्वदेशी पुरुष ४९१ र महिला ४३८ गरी ९२९ र विदेशी पुरुष ४२ र महिला २४ गरी ६६ पर्यटकले निःशुल्क सेवा लिएको उनले बताए ।
विशेष गरी थोराङ्ला भञ्ज्याङ, तिलिचो ताल, आइसलेक जान मनाङ आउने पर्यटकले स्वास्थ्य सेवा लिने गरेको उनले बताए ।
‘मनाङको पर्यटकीय क्षेत्र अन्नपूर्ण पदमार्गको यात्राका लागि सीधै माथिल्लो मनाङ सवारीसाधनमार्फत पुग्दा पर्यटकलाई समस्या हुने गरेको पाइएको छ । लेक लाग्ने, झाडापखाला, वान्ता हुने समस्याबाट बिरामी भएर निःशुल्क सेवा लिन आउने गर्छन्,’ उनले भने, ‘विदेशी पर्यटकले केही मात्रामा सावधानी अपनाउने गरेको पाइएको छ ।’
बिरामी परेर एक्यापमा आइपुगेका पर्यटक तथा स्थानीयलाई सेवा प्रवाह गरिएको उनले बताए । पर्यटकमा बढी मात्रामा लेक लाग्ने समस्या भएको हुन्छ भने स्थानीयमा अन्य समस्या लिएर स्वास्थ्य सेवा लिने गरेका उनको भनाइ छ ।
‘मनाङ यात्राको क्रममा बिरामी परेर आएका पर्यटकलाई औषधिसहित परामर्श दिने गरेका छौँ,’ उनले भने, ।
बिरामीलाई सेवा प्रवाह गरिए पनि परामर्श केन्द्र स्थापना गरेर भने सेवा प्रवाह गर्न नसकिएको उनले बताए । लेक लाग्दा हुने झाडापखाला, वान्ता हुने समस्या लिएर आउने पर्यटकलाई सेवा प्रवाह गरिएको उनले बताए ।
स्थानीय महिला बढी मात्रामा जोर्नी दुख्ने, श्वासप्रश्वासको समस्या, उच्च रक्तचाप सम्बन्धित रोगको उपचारका लागि औषधि तथा परामर्श लिन आउने गरेको स्वास्थ्य शाखा प्रमुख अर्यालले बताए ।
उनका अनुसार यससँगै महिला पाठेघरसम्बन्धी समस्या लिएर पनि आउने गरेका छन् ।
पाठेघरको उपचार पूर्ण रूपमा नहुने भए पनि परामर्श र प्रिस्क्राइब भएका औषधि उपलब्ध भएसम्म बिरामीलाई दिइने गरेको उनले बताए ।
थप समस्या देखिएमा बिरामीलाई सम्बन्धित चिकित्सक वा अस्पतालमा उपचारका लागि जान परामर्श गर्ने गरिएको उनले बताए ।
उनका अनुसार जोर्नी दुख्ने, श्वासप्रश्वास, उच्च रक्तचाप, रुघाखोकी, लेक लागेर झाडापखाला, वान्तालगायत चिसोका कारण हुने समस्या भएका बिरामीलाई एक्यापले निःशुल्क सेवा प्रवाह गर्दै आएको छ ।
पदयात्राका लागि पर्यटक मनाङ आउने समय भएको छ । यस वर्ष हिमपात कम भएकाले पर्यटक अफसिजनमा पनि आइरहेको अन्नपूर्ण संरक्षण क्षेत्र आयोजनाका प्रमुख लेखनाथ गौतमले जानकारी दिए ।
‘दैनिक रूपमा पर्यटक आउन थालिए सकेका छन्, दैनिक करिब ५० पर्यटक मनाङ भित्रिरहेका छन्,’ उनले भने ।
पहिलो पटक पदयात्रामा आउने पर्यटकलाई सहज बनाउने उद्देश्यले लोकेसन म्याप ९स्थानको नक्सा० निर्माण गरिएको उनले बताए ।
‘हिमपात भइरहने हो मनाङ, गन्तव्यमा पुग्ने स्थानसम्मको यात्रामा नझुक्कियोस् भनेर साइनिङ पोल, म्याप पोस्टिङ, आवश्यक संकेत चिह्न र पुग्नुपर्ने गन्तव्यको नक्सा निर्माण गरिएका छन,’ उनले भने ।
५ हजार ४१६ मिटर उचाइमा रहेका कथोराङ्ला जाने पदमार्ग र ५ हजार ९१९ मिटर उचाइमा रहेको तिलिचो तालसम्मको पदमार्गमा सेतो, पहेँलो र निलो रङका पोल राखिएको छ ।
उक्त क्षेत्रमा ३÷४ फिटसम्मको हिमपात हुन सक्ने सम्भाव्यतालाई मध्यनजर गरी बाटो पहिचानका लागि विभिन्न रङको पोल राखिएको आयोजना प्रमुख गौतमले बताए ।
उनका अनुसार सहज रूपमा बाटो पहिचान होस् र पर्यटकलाई यात्रा सजिलो बनाउने उद्देश्यले पोल राखिएको हो । बाटोको भौगोलिक अवस्थाअनुसार एकपछि अर्को स्थानको पोल देखिने गरी उक्त क्षेत्रमा पोल राखिएको आयोजनाले जनाएको छ ।
पोल राखिँदा पटकपटक उक्त मार्गबाट यात्रा गरिसकेका पर्यटकले बाटो पुरिँदासमेत पहिचान गर्न सक्छन् भने पहिलो पटक जाने पर्यटकलाई बाटो पहिचान गर्न सहज हुनेछ ।
