पोखरा–निजी क्षेत्रको हवाई कम्पनी बुद्ध एयरले पोखरालाई पूर्वी गन्तव्यसम्म हवाई माध्यममार्फत जोड्ने तयारी थालेको छ । ९ मार्च ९ बिहीबारदेखि बुद्ध एयरले पोखरादेखि भद्रपुरसम्म सिधा हवाई उडान गर्ने तयारी थालेको छ । पोखरा–भद्रपुर उडानले पश्चिम बंगाल हुँदै भित्रिने भारतीय पर्यटक र नेपालको पूर्वी भेगबाट पोखरासम्म आउजाउ गर्ने आन्तरिक पर्यटकलाई सहज हुने बुद्ध एयरका प्रवक्ता दीपेन्द्रकुमार कर्णले बताए ।
उनका अनुुसार पोखरा अन्तर्राष्ट्रिय विमानस्थलमा रात्रिकालीन विश्राम हुने गरी बुद्धले कम्तिमा ४ वटा जहाज पोखरामा राख्दैछ । तिनै जहाजबाट विभिन्न गन्तव्यसम्म उडानको तयारी थालिएको कर्णले बताए ।
कर्णका अनुसार पोखराबाट बिहान ६ः१५ मा जहाज भद्रपुरका लागि उड्नेछ । भद्रपुरबाट पोखराका लागि भने बेलुकी ६ः५५ मा उडान हुनेछ ।
त्यस्तै व्यावसायिक कामकाजले आउजाउ गर्ने व्यवसायीलाई पनि यो सेवाले सहज बनाउने उनको भनाइ छ । अहिले भद्रपुरसम्म हवाईजहाजबाट आउजाउ गर्नुपर्दा काठमाडौं हुँदै यात्रा गर्नुपर्छ । त्यसले गर्दा २ पटक उडान गर्नुपर्नेमा अब त्यो बाध्यता हट्ने उनले बताए ।
अहिले पोखराबाट स्थलमार्गमार्फत भद्रपुर पुग्दा कम्तिमा १५ घण्टासम्म यात्रा गर्र्नुपर्छ । सिधा उडानले आन्तरिक गन्तव्य इलामसहित भारतका दार्जिलिङ, सिक्किमसहितका गन्तव्यमा आउजाउ गर्न सहज हुनेछ । त्यस्तै काकडभिट्टा नाकाबाट गरिने आर्थिक कारोबारलाई पनि सहज हुने कर्णले बताए ।
कर्णका अनुसार बुद्ध एयरले मार्च ९ देखि पोखरा अन्तर्राष्ट्रिय विमानस्थलमा रात्रिकालीन उडान पनि सुरु गर्दैछ । पोखरामै रात्री बिसान भएका जहाजलाई बिहानै विभिन्न गन्तव्यसम्म उडान गर्ने तयारी बुद्धको छ । बुद्धले अहिले पोखराबाट काठमाडौं, भरतपुर, भैरहवा र नेपालगञ्ज दैनिक उडान गरिरहेको छ ।
