नेपालगन्ज– नेपालगन्जमा सिकिस्त बिरामीलाई उपचारका लागि काठमाडौँ वा भारतको लखनउ पुर्याउनुपर्ने बाध्यता हट्दै गएको छ ।
सिकिस्त बिरामीको उपचार सेवालाई थप प्रभावकारी बनाउन नेपालगन्जस्थित वेस्र्टन अस्पतालले अत्याधुनिक सुविधासहित ८ शय्याको सघन उपचार कक्ष (आइसियू) सेवा सुरु गरेपछि अब सिकिस्त बिरामीको उपचार पनि नेपालगन्जमै सम्भव भएको अस्पतालका प्रबन्ध निर्देशक डा। राहुल थापाले जानकारी दिए ।
उनका अनुसार यसअघि भेरी अस्पताल र नेपालगन्ज मेडिकल कलेजको शिक्षण अस्पतालमा सीमित सघन उपचार कक्ष रहे पनि सिकिस्त बिरामीको संख्या धेरै हुने हुँदा थप उपचारका लागि काठमाडौँ वा भारतको लखनउ रिफर गर्नुपर्ने बाध्यता थियो ।
आइसियू सञ्चालन नहुँदा वेस्टर्न अस्पतालले मात्रै दैनिक करिब ५ जना सिकिस्त बिरामीलाई थप उपचारका लागि काठमाडौँ वा भारतको लखनउ पठाउँदै आएको थियो ।
अब नेपालगन्जमै आइसियू कक्ष भएपछि बिरामीले आफ्नै ठाउँमा सहज रूपमा उपचार पाउने डा। थापाको भनाइ छ ।
आइसियूमा भर्ना हुने हरेक बिरामीका लागि १–१ जना तालिम प्राप्त नर्सका साथै चौबिसै घन्टा ‘क्रिटिकल केयर कन्सल्टेन्ट’ चिकित्सकको निगरानी रहने व्यवस्था मिलाइएको छ ।
यस्तो सुविधा भएको आइसियू सञ्चालन गर्ने वेस्टर्न अस्पताल काठमाडौँ उपत्यका बाहिरको पहिलो निजी अस्पताल हो ।
