काठमाडौँ– पहिलो लेगको नतिजा उल्टाउँदै इंग्लिस क्लब चेल्सी युइएफए च्याम्पियन्स लिग फुटबल प्रतियोगिताको क्वार्टरफाइनलमा प्रवेश गरेको छ ।
गएराति भएको प्रि–क्वार्टरफाइनलको दोस्रो लेगको खेलमा जर्मन क्लब बोरुसिया डर्टमुन्डमाथि २–० गोल अन्तरले हराउँदै चेल्सी क्वार्टरफाइनलमा प्रवेश गरेको हो ।
घरेलु मैदान स्टामफोर्ड ब्रिजमा भएको दोस्रो लेगमा २–० ले जितेपछि समग्रमा २–१ को जित निकाल्दै चेल्सीले अन्तिम आठमा स्थान पक्का गरेको हो ।
पहिलो लेगमा चेल्सी १–० ले पराजित भएको थियो । घरेलु मैदानमा चेल्सीले नतिजा उल्टाएको हो । चेल्सीको जितमा रहिम स्टर्लिङ र काई हाभर्टजले समान एक गोल गरे ।
खेलको ४३औँ मिनेटमा स्टर्लिङले गोल गर्दै चेल्सीलाई पहिलो हाफमा १–० को अग्रता दिलाएका थिए । त्यसपछि हाभर्टजले ५३ औँ मिनेटमा पेनाल्टीमा गोल गर्दै चेल्सीको अग्रता दोब्बर पारे ।
डर्टमुन्डले अन्तिमसम्म पनि खेलमा फर्कने प्रयास गरेको थियो । तर, सफल हुन सकेन र अन्तिम १६ बाटै बाहिरियो ।
