चार करोड बढीको लिलाम बिक्री, यात्रुसँग जफत गरिएको मोबाइलमात्रै एक करोड ७३ लाख
काठमाडौँ– त्रिभुवन अन्तर्राष्ट्रिय भन्सार कार्यायलले करिब चार करोड रुपैयाँ बराबरको सामान लिलाम बिक्री गरेको छ ।
कार्यालयले चालु आर्थिक वर्षको हालसम्म मोबाइल, मदिरा, सवारीसाधन, कपडा, खाद्य पदार्थ तथा इलेक्ट्रोनिक सामान लिलाम बिक्रीबाट तीन करोड ८९ लाख ८१ हजार पाँच सय ५७ रुपैयाँ राजस्व सङ्कलन गरेको हो ।
कार्यालयलाई तीन सय ३२ थान मोबाइल लिलाम बिक्रीबाट एक करोड ७३ लाख २६ हजार सात सय चार रुपैयाँ राजस्व प्राप्त भएको छ । यी मोबाइल विदेशबाट फर्किने यात्रुसँग जफत गरिएको हो ।
यस्तै, दुई हजार पाँच सय पाँच थान मदिरा लिलाम बिक्रीबाट कार्यालयले एक करोड पाँच लाख ८६ हजार छ सय ९७ रुपैयाँ बराबर राजस्व सङ्कलन भएको जनाएको छ ।
सवारीसाधन, कपडा, खाद्य पदार्थ, इलेक्ट्रोनिकलगायतका मालवस्तु लिलाम बिक्रीबाट एक करोड १० लाख ६८ हजार एक सय ५६ रुपैयाँ सङ्कलन भएको विमानस्थल भन्सार कार्यालयका भन्सार अधिकृत नारद पोखरेलले जानकारी दिए ।
उनका अनुसार कानूनअनुसार हाल त्रिभुवन अन्तर्राष्ट्रिय विमानस्थल हुँदै एक व्यक्तिले एउटाभन्दा बढी थान मोबाइल तथा एक बोतलभन्दा बढी मदिरा ल्याउन पाइँदैन ।
कानूनले तोकेभन्दा बढी सङ्ख्यामा ल्याइएका सामग्री भए आर्थिक ऐनबमोजिम भन्सार महसुल तिर्नुपर्ने हुन्छ । कार्यालयले स्वदेशी तथा विदेशीबाट जफत गरिएको एप्पल कम्पनीका आइफोन, सामसुङलगायत महँगा मोबाइल फोन तथा मदिरा बिक्री गर्दै आएको छ ।
