काठमाडौँ– नेपाल बचत तथा ऋण केन्द्रीय सहकारी संघ (नेफ्स्कून)ले आयोजना गरेको व्यवस्थापन प्रमुखहरूको राष्ट्रिय गोष्ठी (सिइओ वर्कसप) १२ बुँदे साझा संकल्प जारी गर्दै बिहीबार सम्पन्न भएको छ ।
२ दिन सञ्चालन भएको गोष्ठीले जिम्मेवार व्यवस्थापन निर्माणमार्फत सुरक्षित बचत तथा ऋण अभियान निर्माणका लागि प्रतिबद्धता व्यक्त गरेको छ ।
गोष्ठीमा राष्ट्रिय तथा अन्तर्राष्ट्रिय विषय विज्ञ तथा स्रोत व्यक्तिहरूको प्रस्तुतीकरण थियो ।
कार्यक्रममा देशभरका करिब ४५० बचत तथा ऋण सहकारी संस्थाका व्यवस्थापन प्रमुख (सिइओ)को उपस्थिति थियो । गोष्ठीमा सहभागी सिइओहरूले सहकारी संस्थाले प्रविधियुक्त सेवा प्रवाह गर्ने, सुशासन कायम गर्ने र संस्थाको छवि निर्माणमा व्यवस्थापन जिम्मेवार बन्ने संकल्प प्रस्ताव पारित गरे ।
गोष्ठीले अलग्गै बचत तथा ऋण सहकारी ऐन निर्माणका लागि ऐक्यबद्धता र आवश्यक पैरबी गर्ने संकल्प समेत पारित गरेको छ । एकीकृत स्वनियमन मार्गनिर्देशन पालन गर्ने, संस्थागत विकास र सुदृढीकरणका लागि स्तरीकरण कार्यक्रममा आबद्ध हुने र सुरक्षित संस्था निर्माण गर्न पल्र्स प्रणालीको पूर्ण कार्यान्वयन गर्ने प्रतिबद्धता सिइओहरूले गरेका छन् ।
त्यस्तै बाध्यकारी नियामकीय प्रबन्ध पूर्ण रूपमा कार्यान्वयन गर्ने समेत प्रतिबद्धता जनाएका छन् । जोखिमहरूको व्यवस्थापन गर्न संस्थागत पुँजी कम्तीमा ५ प्रतिशत कायम गरी स्थिरीकरण कोषमा आबद्ध हुने समेत उनीहरूले प्रतिबद्धता जनाएका छन् ।
नेफ्स्कूनका कोषाध्यक्ष एवं कार्यक्रम संयोजक दीपक पनेरुले साझा संकल्प वाचन गरेका थिए । साझा संकल्प वाचन गर्दै पनेरुले सहकारी अभियानको वर्तमान समस्या सम्बोधनमा दिशानिर्देशन गर्ने बताए ।
