काठमाडौँ– टेलिभिजन गायन रियालिटी सो ‘द भ्वाइस किड्स नेपाल सिजन–२’को प्रसारण आज (शुक्रबार) सुरु हुने भएको छ ।
बिहीबार काठमाडौँमा भ्वाइस किड्सको प्रिमियर सो गर्दै यस बारेमा जानकारी गराइएको हो ।
६ देखि १४ वर्षसम्मका बालबालिकाको सहभागिता रहने सो प्रसारणको पूर्वसन्ध्यामा बिहीबार बेलुका पहिलो एपिसोडको ग्रान्ड प्रिमियर गरिएको थियो । प्रिमियरमा कोच प्रमोद खरेल, निर्देशक लक्ष्मण पौडेल र प्रश्तोता सुशील नेपाल उपस्थित थिए ।
डिजिटल अडिसनमा सहभागी भएका प्रतियोगी बालबालिकाबाट छानिएका ६५ मध्ये ६ जना प्रतियोगीले पहिलो एपिसोडमा कोचको सामना गरे ।
सुरुआती केही एपिसोड ब्लाइन्ड अडिसनको हुनेछ । ग्रान्ड प्रिमियरपछि सञ्चारकर्मीहरूसँग कुरा गर्दै गायक प्रमोद खरेलले गिलो माटोलाई आकार दिन सकेझैँ साना बालबालिकाहरूलाई गायन क्षेत्रमा अब्बल बनाउन यो शो महत्वपूर्ण रहेको बताए ।
उनले बालबालिकाले सबै जनराको गीत गाउने गरेको भन्दै बालबालिकामा सबै गर्न सक्ने प्रतिभा रहेको बताए । आफ्नो समूहले जित्ने भन्दा पनि राम्रो प्रतिभा ल्याउनुपर्छ भन्ने धारणा रहेको उनको भनाइ थियो ।
द भ्वाइस किड्स सिजन २ हरेक शुक्रबार र शनिबार राति ८ बजे हिमालयन टेलिभिजनबाट प्रसारण हुनेछ ।
