काठमाडौँ- घरेलु मैदानमा आठौँ मिनेटमा नै पछि परेको रियल म्याड्रिडले अन्ततः खेल उल्टाएको छ ।
स्पेनिस ला लिगा फुटबलअन्तर्गत गएराति भएको खेलमा रियलले पुनरागमन गर्दै क्याटलान क्लब स्पानियोलले लिएको अग्रता उल्टाएको हो । खेल उल्टाउँदै रियलले ३–१ गोल अन्तरको जित निकाल्न सफल भयो ।
खेलको आठौँ मिनेटमा नै जोसेलुले गोल गर्दै स्पानियोललाई सुरुवाती अग्रता दिलाएका थिए ।
तर, स्पानियोलले लिएको अग्रता धेरैबेर टिकेन । खेलको २२ औँ मिनेटमा भिनिसियस जुनियरले गोल गर्दै रियललाई १–१ गोलको बराबरीमा ल्याए ।
यस्तै, खेलको ३९ औँ मिनेटमा इडर मिलिटाओले गोल गर्दै रियललाई २–१ को अग्रता दिलाए ।
त्यसपछि पनि रियलले आक्रामक खेल रोकेन । खेलको इन्जुरी समयमा मार्को एसेन्सियोले गोल गर्दै रियललाई ३–१ को जित दिलाए ।
दोस्रो स्थानमा रहेको रियलले जितसँगै २५ खेलमा ५६ अंक जोडेको छ । स्पानियोल भने २७ अंक जोडेर १४ औँ स्थानमा रहेको छ ।
