काठमाडौँ– उपराष्ट्रपति निर्वाचनका लागि मौन अवधि आज बिहानदेखि लागु भएको छ ।
चैत ३ का लागि तय गरिएको उपराष्ट्रपति पदको निर्वाचनका लागि निर्वाचन आयोगले आगामी गएराति १२ बजेपछि अर्थात् आज बिहानदेखि प्रचारप्रसार निषेध गरेसँगै मौन अवधि सुरु भएको हो । निर्वाचन नसक्दासम्म अब कुनै पनि उम्मेदवारको पक्षमा मत माग्न वा प्रचार गर्न पाइने छैन ।
मतदान हुने दिनभन्दा ४८ घण्टा अगावै अर्थात् फागुन ३० गते राति १२ बजेदेखि मतदान केन्द्र बन्द नहुन्जेलसम्म निषेधको अवधि लागू गरिएको आयोगले जनाएको छ ।
निर्वाचनका लागि आयोगले निर्वाचन आयोग ऐन, २०७३ को दफा २२ ले दिएको अधिकार प्रयोग गरी २०७९ फागुन १७ गतेदेखि चैत ५ गतेसम्म कायम रहने गरी निर्वाचन आचारसंहिता, २०७९ जारी गरिसकेको छ ।
उक्त आचारसंहिताबमोजिम निर्वाचनलाई स्वच्छ, स्वतन्त्र, निष्पक्ष, विश्वसनीय, पारदर्शी तथा भयमुक्त वातावरणमा सम्पन्न गर्न निषेधको अवधि लागू हुने आयोगका प्रवक्ता शालिग्राम शर्मा पौडेलले जानकारी दिए ।
निर्वाचन (कसुर तथा सजाय) ऐन, ७३ को दफा २४ को ५ तथा निर्वाचन आचारसंहिता, २०७९ को दफा १७ बमोजिम उक्त अवधिमा निर्वाचन प्रचारप्रसार लगायत कुनै पनि प्रकारका छलफल, अन्तरक्रिया, सभा, सम्मेलन, कार्यशाला, गोष्ठी आदि गर्न निषेध गरिएको छ । साथै उम्मेदवारको पक्ष वा विपक्षमा कुनै पनि प्रकारको प्रचारप्रसार गर्न, मत माग्न, एसएमएस, फेसबुक, भाइबरजस्ता विद्युतीय माध्यमद्वारा प्रयोग गरिने सामाजिक सञ्जालबाट मत माग्न, आचारसंहिता विपरीत वक्तव्य दिन, प्रेस विज्ञप्ति निकाल्न, प्रकाशन तथा प्रसारण गर्न, सञ्चारमाध्यमबाट जीत÷हारको पूर्वानुमानका सामग्रीहरु प्रसारजस्ता कार्य गर्न नहुने आयोगले स्पष्ट पारेको छ ।
निर्वाचनका लागि उम्मेदवारहरूको मनोनयनपत्र दर्ता भइसकेको छ । अष्टलक्ष्मी शाक्य (बोहरा), प्रमिला कुमारी, ममता झा र रामसहायप्रसाद यादव उम्मेदवार रहेका थिए ।
यद्यपि, प्रमिलाले आफ्नो समर्थन यादवलाई रहने घोषणा गरिसकेकी छिन् ।
उपराष्ट्रपति निर्वाचनमा प्रतिनिधिसभा, राष्ट्रिय सभा र प्रदेशसभाका सदस्यहरू मतदाता हुनेछन् । यसअघि तिनै मतदाताले राष्ट्रपतिमा नौदलीय गठबन्धनको तर्फबाट नेपाली कांग्रेसका उम्मेदवार रामचन्द्र पौडेललाई चुनिसकेका छन् ।
