काठमाडौं –निर्वाचन आयोगले उपराष्ट्रपति निर्वाचनको आचारसंहिता पालना गर्न आग्रह गरेको छ ।
आयोगका प्रवक्ता शालिग्राम शर्मा पौडेलले बिहीबार जारी गरेको विज्ञप्तिमा प्रचारप्रसार गर्न नपाइने अवधिमा उम्मेदवारलाई मत दिने÷नदिने निर्णय गर्न नपाइने व्यवस्था पालना गर्न आग्रह गरिएको छ । एसएसम गर्न नपाइने, समाजिक सञ्जालमार्फत मत माग्न नपाइने विषयमा पनि ध्यान दिन आयोगले आग्रह गरेको छ ।
उपराष्ट्रपति निर्वाचनको प्रचारप्रसार गर्न नपाइने अवधिमा नेपाली कांग्रेसले उपराष्ट्रपतिका उम्मेदवार रामसहायप्रसाद यादवका पक्षमा मतदान गर्ने निर्णय गरेको थियो । त्यस विषयमा आयोगले स्पष्टीकरण सोधेको छ ।
यस्तै, उपराष्ट्रपति निर्वाचनबारे निर्णय गर्न राष्ट्रिय स्वतन्त्र पार्टी (रास्वपा)ले शुक्रबार बैठक बोलाएको छ ।
‘निर्वाचन (कसुर तथा सजाय) ऐन, ७३ को दफा २४ को ५ तथा निर्वाचन आचारसंहिता, २०७९ को दफा १७ बमोजिम यस अवधिमा निर्वाचन प्रचारप्रसारलगायत सोसँग सम्बन्धित कुनै पनि प्रकारका बैठक, छलफल, अन्तरक्रिया, सभा, सम्मेलन, कार्यशाला, गोष्ठी आदि गर्न, उम्मेदवाको पक्ष वा विपक्षमा कुनै पनि प्रकारको प्रचारप्रसार गर्न, मत माग्न, एसएमएस, फेसबुक, भाइबरजस्ता विद्युतीय माध्यमद्वारा प्रयोग गरिने सामाजिक सञ्जालबाट मत माग्न, आचारसंहिताविपरीत वक्तव्य दिन, प्रेस विज्ञप्ति निकाल्न, प्रकाशन तथा प्रसारण गर्न, राजनीतिक दलहरूको बैठकबाट उम्मेदवारहरूलाई मत दिने वा नदिने निर्णय गर्न, सञ्चारमाध्यमबाट जित÷हारको पूर्वानुमानका सामग्रीहरू प्रसारजस्ता कार्य गर्न नहुने भएको हुँदा यस्ता आचारणहरू पालना गर्न/गराउन सम्बन्धित उमेदवार, उमेदवारका प्रतिनिधि, राजनीतिक दललगायत सम्पूर्ण सरोकारवालालाई आयोग पुनः आग्रह गर्दछ,’ विज्ञप्तिमा उल्लेख छ ।
