रोनाल्डो राष्ट्रिय टोलीमा अटाए, कप्तानी पनि कायमै

काठमाडौँ– सन् २०२४ मा जर्मनीमा हुने युरोपियन च्याम्पियनसिप (युरोकप) फुटबल प्रतियोगिताको छनोट खेल्ने पोर्चुगल राष्ट्रिय टोलीमा सुपरस्टार खेलाडी क्रिस्टियानो रोनाल्डो अटाएका छन् ।

मुख्य प्रशिक्षक रोबर्टो मार्टिनेजले रोनाल्डोलाई स्थान दिएका हुन् । 

सन् २०२२ को कतार विश्वकपमा खराब प्रदर्शन गरेपछि रोनाल्डो युरोपका क्लबको रोजाइमा परेनन् । उनी यतिबेला साउदी अरेबियाको लिग खेलिरहेका छन् । ३८ वर्षीय रोनाल्डोको प्रदर्शन त्यहाँ पनि सामान्य मात्र छ । यसर्थ, उनको अन्तर्राष्ट्रिय भविश्यमाथि नै प्रश्न उठ्दै आएको थियो ।

तर, स्पेनिस नागरिक रहेका प्रशिक्षक मार्टिनेजले रोनाल्डोलाई टोलीमा समेट्दै कप्तानी पनि कायमै राखेका छन् । 

पोर्चुगलले यसै महिना युरोकप छनोटमा लिक्टेन्सटाइन र लक्जेम्बर्गसँग खेल्दैछ ।

पोर्चुगलले मार्च २३ मा लिक्टेन्सटाइन र त्यसको तीन दिनपछि लक्जेम्बर्गसँग खेल्ने तालिका छ ।

कतार विश्वकपमा रोनाल्टो नेतृत्वको पोर्चुगल क्वार्टरफाइनलमा मोरक्कोसँग पराजित भएको थियो । उनले भने खेल बेन्चबाट सुरु गरेका थिए ।

रोनाल्डोले पोर्चुगलका लागि १९६ खेलमा कीर्तिमानी ११८ गोल गरेका छन् । उनी अन्तर्राष्ट्रिय फुटबलका सर्वाधिक गोलकर्ता हुन् ।

२६ सदस्यीय टोलीमा घाइते भएर विश्वकप गुमाएका लिभरपुलका खेलाडी डिएगो जोटाले पनि स्थान बनाएका छन् ।