काठमाडौँ– सन् २०२४ मा जर्मनीमा हुने युरोपियन च्याम्पियनसिप (युरोकप) फुटबल प्रतियोगिताको छनोट खेल्ने स्पेन राष्ट्रिय टोलीमा ३३ वर्षीय भेट्रान डिफेन्डर डिफेन्डर जोर्डी अल्बा अटाएनन् ।
स्पेनका नवनियुक्त मुख्य प्रशिक्षक लुइस फुइन्टेले हालै घोषणा गरेको २६ सदस्यीय टोलीमा कप्तानका दाबेदारसमेत रहेका अल्बा नअटाएका हुन् ।
गत वर्षको १६ डिसेम्बरमा नियमित कप्तान सर्जियो बुस्केट्ले सन्यास लिएपछि उपकप्तान रहेका अल्बा कप्तानका स्वतः दाबेदार थिए ।
स्पेनिस फुटबल संघको नियमअनुसार टोलीमा बोलाइएकामध्ये सबैभन्दा बढी खेल खेल्ने खेलाडी स्वतः कप्तान हुन्छन् । यसर्थ, ९१ खेल खेलिसकेका अल्बा टोलीमै अटाएनन् र कप्तान हुनबाट बञ्चित भएका छन् ।
बार्सिलोनाका अल्बा एट्लेटिको म्याड्रिडका कोके कप्तानको दाबेदार थिए । तर, उनलाई पनि टोलीमा नबोलाइएपछि सोही क्लबका अल्भारो मोराटाले छनोट खेलमा कप्तानी गर्ने भएका छन् ।
स्पेनले मार्च २५ मा नर्वे र २८ मा स्कटल्यान्डविरुद्ध खेल्दैछ । नर्वेविरुद्धको खेल घरेलु मैदानमा हुनेछ ।
