आज विश्वासको मत लिँदै प्रधानमन्त्री प्रचण्ड, यस्तो छ संसद्‌मा अंकगणित 

काठमाडौं– प्रधानमन्त्री पुष्पकमल दाहाल प्रचण्डले आज बस्ने प्रतिनिधिसभा बैठकमा विश्वासको मत लिने भएका छन् । सभामुख देवराज घिमिरेले प्रधानमन्त्री प्रचण्डले सोमबार दिउँसो १ बजे प्रतिनिधिसभा बैठकमा विश्वासको मत लिने कार्यक्रम तय भएको जानकारी दिए ।

पुस १० गते प्रधानमन्त्री बनेका प्रचण्डले पुस २६ गते विश्वासको मत लिएका थिए । सरकारलाई समर्थन गरेका नेकपा (एमाले) र राष्ट्रिय प्रजातन्त्र पार्टी (राप्रपा)ले समर्थन फिर्ता लिई सरकारबाट पनि बाहिरिएपछि उनले पुनः प्रतिनिधिसभाबाट विश्वासको मत लिन लागेका हुन् ।

नेकपा (माओवादी केन्द्र)का अध्यक्षसमेत रहेका प्रधानमन्त्री प्रचण्डलाई नेपाली कांग्रेस, राष्ट्रिय स्वतन्त्र पार्टी (रास्वपा), जनता समाजवादी पार्टी (जसपा), नेकपा (एकीकृत समाजवादी), जनमत पार्टी, नागरिक उन्मुक्ति पार्टी, लोकतान्त्रिक समाजवादी पार्टी (लोसपा), राष्ट्रिय जनमोर्चा, नेपाल समाजवादी पार्टी, आम जनता पार्टीलगायत दलले विश्वासको मत दिने तयारी गरेका छन् ।

प्रधानमन्त्रीले बहुमतका लागि १३८ जना सांसदको साथ लिनुपर्ने हुन्छ । १० दलको समर्थन भएमा प्रधानमन्त्रीले सजिलै विश्वासको मत पाउने देखिन्छ । प्रतिनिधि सभामा कांग्रेसका ८८, माओवादीका ३२, रास्वपाका १९, जसपाका १२, एकीकृत समाजवादीका १०, जनमतका ६, नागरिक उन्मुक्तिका ४, लोसपाका ४, राष्ट्रिय जनमोर्चाको १, नेपाल समाजवादी पार्टीको १, आम जनता पार्टीको १ सांसद छन् । केही स्वतन्त्र सांसदले पनि प्रधानमन्त्रीलाई विश्वासको मत दिने सम्भावना छ । यी सबै जोड्दा कम्तीमा १७७ मत हुन्छ । 

७९ जना सांसद भएको एमाले प्रमुख प्रतिपक्षमा बसेको छ । १४ सांसद भएको राप्रपा पनि प्रतिपक्षमा बसेको छ । कांग्रेसलगायत दल प्रतिनिधिसभाको आइतबारको बैठकबाट सत्तापक्ष लहरमा बसेका थिए भने एमाले र राप्रपा प्रतिपक्षी लहरमा ।

कांग्रेस, रास्वपा, एकीकृत समाजवादीले पार्टी बैठकबाट प्रधानमन्त्रीलाई विश्वासको मत दिने निर्णय गरिसकेका छन् । 

प्रधानमन्त्रीले विश्वासको मत लिएपछि उनले  मन्त्रिपरिषद् बिस्तारकाे काम अघि बढाउने बताइएकाे छ ।