काठमाडौँ–  फ्रेन्च लिग वानमा लियोनल मेसी, केलियन एम्बाप्पेजस्ता स्टार खेलाडीले भरिएको पेरिस सेन्ट जर्मेन (पिएसजी) घरेलु मैदानमै पराजित भएको छ ।

लिग वानमा शीर्ष स्थानमा रहेको पिएसजी तुलनात्मक कमजोर प्रतिद्वन्द्वी रेनेससँग २–० ले स्तब्ध बनेको हो ।

पार्क डेस प्रिन्सेसमा आइतबार राति भएको खेलअन्तर्गत रेनेसको जितमा कार्ल टोको एकम्बी र एर्नाउड कालीमुइन्डोले समान १ गोल गरे । एकम्बलिे ४५ औँ तथा कालीमुइन्डोले ४८ औँ मिनेटमा गोल गरेका थिए । 

पिएसजीले अग्रपङ्तिमा मेसी, एम्बाप्पेजस्ता स्टार खेलाडीलाई उतारेको थियो । तर, खेलमा फर्कने धेरै समय हुँदा पनि उनीहरूले त्यसको सदुपयोग गर्न सकेनन् र पिएसजी पराजित हुन पुग्यो ।

जारी लिगमा पिएसजीको यो चौथो हार हो । यद्यपि, हारका बावजुत पिएसजी २८ खेलबाट ६६ अंक जोडेर शीर्ष स्थानमा कायमै छ ।

पिएसजीलाई पराजित गरेको रेनेस ५० अंक जोडेर लिगको पाँचौं स्थानमा उक्लिएको छ ।