काठमाडौँ– कुनैबेला आफू ‘जातीवाद’को शिकार भएको आरोप लगाउँदै जर्मन राष्ट्रिय टोली छोडेका मिडफिल्डर मेसुट ओजिलले क्लब फुटबलबाट पनि सन्यासको घोषणा गरेका छन् ।

ओजिलले ३४ वर्षको उमेरमै सबैखाले फुटबल खेल जीवनबाट सन्यास घोषणा गरेका हुन् ।

आर्सनल र रियल म्याड्रिडका पूर्वमिडफिल्डर ओजिलले सामाजिक सञ्जालबाट यस्तो घोषणा गरेका हुन् ।

‘मैले १७ वर्ष व्यवसायिक फुटबल खेलेँ । म आफूलाई खेलाडीको विशेषाधिकार पाएको भन्ने ठान्छु । म यो अवसरका अविश्वसनीय मान्छु र आभर महसुस गर्छु,’ सन्यास घोषणा गर्दै उनले लेखेका छन् ।

ओजिल पछिल्लो समय टर्किस क्लब इस्तानबुल बासाकसेहिरबाट खेलिरहेका थिए ।

सन् २०१८ मा रुसमा भएको विश्वकपमा तत्कालीन साविक विजेता जर्मनी समूह चरणबाटै बाहिरिएको थियो । यसलाई लिएर खेलाडीहरूलाई समर्थकले गाली गरेका थिए ।

टर्किस मूलका ओजिलले भने सो गाली नसकी २९ वर्षको उमेरमै राष्ट्रिय टोलीबाट सन्यास लिएका थिए । सो बेला उनले जर्मन टोलीमा जातीवाद हाबी रहेको बताएका थिए ।

सन् २००९ मा जर्मन टोलीमा डेब्यू गरेका ओजिलले राष्ट्रिय टोलीका लागि ९२ खेल खेलेका छन् ।

सन् २०१४ मा जर्मनीले विश्वकप जित्दा ओजिल मुख्य खेलाडीमध्ये एक रहेका थिए ।

पाँच पटक जर्मन वर्ष खेलाडी चुनिएका ओजिलले सन् २०१० को विश्वकप र २०१२ र २०१६ को युरोकपसमेत खेलेका थिए ।