काठमाडौँ– अन्तराष्ट्रिय मैत्रीपूर्ण फुटबल खेलमा विश्वकप विजेता अर्जेन्टिनाले मनामालाई २–० ले हराएको छ ।
अर्जेन्टिनाको राजधानी ब्युनस आइरेसस्थित मोनुमेन्टल रंगशालामा भर्खरै सम्पन्न उक्त खेलमा कप्तान लियोनल मेसी र थियागो अल्माडाले एक–एक गोल गरे ।
धेरै आक्रमण गरेपछि पहिलो गोलका लागि घरेलु टोली ७८ मिनेटसम्म कुर्नुपरेको थियो । अल्माडाले डेडअक तोडेका थिए ।
त्यसपछि मेसीले ८९औँ मिनेटमा मेसीले फ्रि–किकमार्फत गोल गरेपछि अर्जेन्टिनाले २–० को सहज जित निकालेको हो ।
यससँगै मेसीले राष्ट्रिय टोलीका लागि ९९औँ गोल गरेका छन् । अब १०० गोलको कीर्तिमान बनाउन उनी एक गोलमात्र टाढा छन् ।
अर्जेन्टिनाले दोस्रो खेल मार्च २७ मा कुराकाओविरुद्ध खेल्नेछ । कोर्डोबास्थित मारियो केम्पास रंगशालामा हुने उक्त खेलमा पनि गोल गरे मेसीले १०० गोल पूरा गर्नेछन् ।
कतारमा गत डिसेम्बरमा विश्वकपको उपाधि जितेयता अर्जेन्टिना पहिलोपल्ट मैदानमा उत्रेको हो । यसर्थ, खेल दौरान विश्वकपको ट्रफीसमेत प्रदर्शन गरिएको थियो ।
