काठमाडौँ– कप्तान क्रिस्टियानो रोनाल्डोले अन्तर्राष्ट्रिय फुटबलमा कीर्तिमानी १२० गोल गर्दा पोर्चुगलले सहज जित निकालेको छ ।
युरोकप छनोटअन्तर्गत समूह ‘जे’ को खेलमा गएराति लिचेस्टाइनमाथि ४–० को सहज जित निकाल्दा रोनाल्डोले आफ्नो गोल संख्या १२० पुर्याएका हुन् ।
राष्ट्रिय टोलीका लागि १९७औँ खेल खेल्दै गर्दा ३८ वर्षीय रोनाल्डोले २ गोल गरेका थिए ।
घरेलु मैदानमा भएको खेलको ८औँ मिनेटमा नै जाओ कान्सेलेले पोर्चुगललाई अग्रता दिलाएका थिए । त्यसपछि ४७औँ मिनेटमा बर्नार्डो सिल्भाले अग्रता दोब्बर बनाए । लगत्तै पोर्चुगलले पेनाल्टी पायो । रोनाल्डोले ५१औँ मिनेटमा त्यसको सदुपयोग गरे ।
पुनः रोनाल्डोले नै ६३औँ मिनेटमा गोल थपेपछि पोर्चुगलको जित सहज भयो ।
जितपछि पोर्चुगलले ३ अंक जोडेको छ ।
सन् २००३ मा पोर्चुगलको राष्ट्रिय टोलीमा डेब्यू गरेका रोनाल्डो अन्तर्राष्ट्रिय फुटबलका कीर्तिमानी गोलकर्ता हुन् ।
