काठमाडौँ– ६२ वर्षपछि इंग्ल्यान्डले इटालीलाई उसकै घरेलु मैदानमा हराएको छ ।

गएराति भएको युरोकप २०२४ को छनोटमा इंग्ल्यान्डले घरेलु टोली इटालीलाई २–१ ले हराएको हो । 

यससँगै सन् १९६१ पछि इंग्ल्यान्डले इटालीमा पहिलो जित हासिल गरेको छ । साथै, इंग्यान्डले सन् २०२१ को युरोकप फाइनलमा घरेलु मैदानमै पराजित भएर उपाधि गुमाउनुपरेको क्षणको इटालीसँग बदलासमेत लिएको छ । 

इंग्ल्यान्डले जित निकाल्दा कप्तान ह्यारी केन सर्वाधिक गोलकर्ता बनेका छन् । उनले इटालीविरुद्ध निर्णायक दोस्रो गोल गर्दै वायन रुनीको कीर्तिमानलाई जितेका हुन् ।

रुनीले २००३ देखि २०१८ को अवधिमा १२० खेलबाट ५३ गोल गर्दै इंग्ल्यान्डको सर्वाधिक गोलकर्ता बनेका थिए ।

रुनीको त्यो कीर्तिमानलाई २९ वर्षीय केनले ८१ खेलमा ५४ गोल गर्दै तोडेका हुन् । 

नापोलीस्थित डिएगो अर्मान्डो म्याराडोना रंगशालामा भएको खेलमा इंग्ल्यान्डले १३औँ मिनेटमै अग्रता लिएको थियो । डेक्लन राइसले अग्रता लिएका हुन् । केनले पेनाल्टीमार्फत गोल गर्दै इंग्ल्यान्डको अग्रता दोब्बर बनाए । तर, माटियो रेटेगुईले ५६औँ मिनेटमा गोल गर्दै इटालीलाई खेलमा फर्काउने कोसिस गरेका थिए । तर, थप गोल गर्न नसक्दा खेल इंग्ल्यान्डले २–१ ले जित्यो ।

यस जितसँगै समूह ‘सी’ रहेको इंग्ल्यान्डले महत्वपूर्ण ३ अंक जोडेको छ ।