काठमाडौँ– सन् २०२४ मा जर्मनीमा हुने युरोकप फुटबल प्रतियोगिताको छनोटमा पोर्चुगलले फराकिलो जित निकालेको छ ।
गएराति भएको खेलमा घरेलु टोली लक्जेम्बर्गमाथि ६–० को फराकिलो जित निकालेको हो ।
खेलको नवौँ मिनेटमा नै कप्तान क्रिस्टियानो रोनाल्डोले गोल गर्दै पोर्चुगललाई सुरुवाती अग्रता दिलाएका थिए ।
त्यसपछि जाओ फेलिक्सले १५ औँ मिनेटमा गोल गरेपछि पोर्चुगलको अग्रता दोब्बर भयो ।
लगत्तै १८ मिनेटमा बर्नार्डो सिल्भाले गोल गर्दै पोर्चुगलले अग्रता तेब्बर बनायो ।
खेलको ३१ औँ मिनेटमा कप्तान रोनाल्डाले नै गोल गरेपछि पोर्चुगलको अग्रता चौबर बन्यो । त्यसपछि ७७ औँ मिनेटमा ओटाभियोले गोल गरेपछि पोर्चुगलले ५ गोलको अग्रता बनायो ।
खेलको ८५औँ मिनेटमा राफयल लियो पेनाल्टीमा चुके । यद्यपि, पोचुर्गल यतिमै रोकिएन । ८८ औँ मिनेटमा लेओले नै गोल गरेपछि पोर्चुगलले लक्बेम्बर्गको पोस्टमा आधा दर्जन गोल छिरायो ।
यस जितसँगै पोर्चुगल समूह ‘जे’मा लगातार दोस्रो जित निकाल्दै शीर्ष स्थानमा रहेको छ । पोर्चुगलको २ खलेबाट ६ अंक जोडेको छ । पराजित लक्जेम्बर्र्ग १ अंक जोडेर पाँचौं स्थानमा छ ।
यही समूहको अर्काे खेलमा स्लोभाकियाले बोस्निया एन्ड हर्जगोभिनालाई २–० ले तथा आइसल्यान्डले लिचेस्टाइनलाई ७–० ले पराजित गरेका छन् ।
यस नतिजासँगै स्लोभाकिया ४ अंक जोडेर दोस्रो स्थानमा रहेको छ । बोस्निया र आइसल्यान्डको समान ३ अंक छ । लिचेस्टाइन अंकविहीन हुँदै पुछारमा छ ।
