काठमाडौँ– अन्तर्राष्ट्रिय मैत्रीपूर्ण फुटबल खेलमा विश्वविजेता अर्जेन्टिनाले फराकिलो जित निकालेको छ ।
अर्जेन्टिनाले काराकाओमाथि ७–० को फराकिलाे जित निकालेको हो ।
घरेलु मैदानमा भर्खरै सम्पन्न खेलमा कप्तान लियोनल मेसीले ह्याट्रिक गरेका छन् । यससँगै मेसीले अर्जेन्टिनाका लागि नवौँ ह्याट्रिक संख्या पुर्याएका छन् । साथै उनले अन्तर्राष्ट्रिय फुटबलमा १०० गोल कटाएका छन् ।
काराकाओविरुद्ध ३ गोल गर्दै मेसीले १०० गोलको कोसेढुंगा पार गरेका हुन् ।
उनले २०, ३३ र ३७ औँ मिनेटमा गोल गर्दै १७ मिनेटमै ह्याट्रिक पूरा गरे ।
यससँगै मेसीकोे अन्तर्राष्ट्रिय गोल संख्या १०२ पुगेको छ ।
एकपक्षीय खेलमा निकोलस गोन्जालेस, इन्जो फर्नान्डेज, एंगेल डी मारिया र गोन्जालो मोन्टियलले १–१ गोल गरेका थिए ।
अन्तर्राष्ट्रिय फुटबलमा पोर्चुगलका क्रिस्टियानो रोनाल्डो सर्वाधिक गोलकर्ता हुन् । उनले १२२ गोल गरिसकेका छन् ।
यस्तै, इरानका अलि देईको गोेल संख्या १०९ छ । उनले भने सन्यास लिइसकेका छन् ।
