काठमाडौं –नेकपा (एमाले)का अध्यक्ष केपी शर्मा ओलीले प्रधानमन्त्री पुष्पकमल दाहाल ‘प्रचण्ड’लाई सरकारको भूमि कहाँदेखि कहाँसम्म मिचिएको छ जवाफ दिन माग गरेका छन् । 

‘हाम्रो सीमा मिचिदो छ । भूमि खुम्चिदो छ । सरकार मौन छ । किनभने, बोल्यो भने उसको सत्ता धरापमा पर्छ,’ ओलीले बिहीबार काठमाडौंमा रिपोटर्स क्लबको रजत महोत्सवको अवसरमा आयोजित कार्यक्रममा भने ।

राष्ट्रियता अफ्ठ्यारोमा हुँदा देशको पक्षमा बोल्दा  पद नै खतरामा पर्छ भनेर सरकार राष्ट्रका पक्षमा बोल्न नसकिरहेको ओलीले टिप्पणी गरे । ‘राष्ट्रको सरकार भन्न लायक अवस्था छैन । नेपाली भूमि मिचिएको बारे प्रधानमन्त्रीले जवाफ दिनुपर्छै’,ओलीले भने ।

‘हाम्रो भूमि र अखण्डताको बारेमा सरकारले अविलम्ब बोलोस् । हाम्रो भूमि के भइरहेको छ ? भूमि अतिक्रमित भएको छ कि छैन ? भएको छ भने कहाँ कहाँ भएको छ ?’आलीले प्रश्न गरे ।

ओलीले अहिलेको सरकारको कुनै गन्तव्य नै नभएको पनि टिप्पणी गरे । अहिलेको सरकार कहाँ पुग्ने र के का लागि बनेको हो भन्नेसमेतमा अलमल रहेको टिप्पणी गरे । ‘सरकारको एउटा गन्तव्य हुनु पर्दछ । कहाँ पुग्ने हो ? के का लागि बनेको हो ? त्यो केही पनि छैन’, उनले भने ।

अहिलेको सत्ता गठबन्धनले देशलाई लामखुट्टेलेझैं चुसिरहेको आरोप लगाउँदै सत्ता गठबन्धनका गतिविधिका कारण देश निरन्तर ओरालोतर्फ लागेको दाबी गरे ।