विराटनगर –कोशी प्रदेश पुनः नामांकन संयुक्त संघर्ष समितिले धरान उपमहानगरपालिकाको मुख्य कार्यालयसहित वडा कार्यालयहरूमा तालाबन्दी गरेको छ ।

प्रदेश १ ले कोशी नाम पाएसँगै आन्दोलनरत संघर्ष समितिले बिहीबार धरान उपमहानगरपालिकाको प्रवेशद्वार र वडा कार्यालयहरूमा तालबान्दी गरेको हो ।

उनीहरूले उपमहानगरपालिकाको प्रवेशद्वारमा कालो झण्डा राखेर प्रदर्शन गर्नुका साथै कार्यालयको कोशी प्रदेश लेखिएको लेटरप्याडसमेत जलाएका थिए ।

संघर्ष समितिले धरानका ५, १५ र १२ नम्बर वडा कार्यालयमा कालो झण्डा राखेर तालाबन्दी गरेको छ । १७ फागुनमा प्रदेशले कोसी नाम पाएसँगै यतिबेला प्रदेश तनावग्रस्त छ ।

पहिचान पक्षधरले दैनिकजस्तो आन्दोलनका कार्यक्रम गरिरहेका छन् । ५ चैतमा विराटनगरमा भएको प्रदर्शनको क्रममा घाइते भएका लिम्बूवान भोलेन्टियर्सका केन्द्रीय सह–कमाण्डर पदम लिम्बू (लाजेहाङ) को उपचारका क्रममा मृत्यु भएको थियो । 

मृतक लिम्बूलाई राष्ट्रिय शहीद घोषणा गर्नुपर्ने मागसहित पहिचान पक्षधरले आन्दोलन चर्काइरहेका छन् । पहिचानको आधारमा प्रदेशको नामकरण नहुन्जेल र मृतक लिम्बूलाई शहीद घोषणा नगरेसम्म शव जिम्मा नलिने आन्दोलन पक्ष र परिवारको अडान छ । उनको शव अहिलेसम्म पनि प्रतिष्ठानको शवगृहमा राखिएको छ ।