पोखरा– गण्डकी प्रदेशका प्रदेश प्रमुख पृथ्वीमान गुरुङले जातीय हक अधिकारका लागि सामूहिक एकता आवश्यक रहेको बताएका छन् ।
पोखरामा आज तमु ह्युल छोंज धिं गुरुङ राष्ट्रिय परिषद्को १३औँ राष्ट्रिय पार्षद सभाको उद्घाटन गर्दै राजनीतिक, सामाजिक र सांस्कृतिक चेतनाका लागि सामूहिक एकता आवश्यक रहेकामा उनले जोड दिए ।
एक्लाएक्लै अघि बढ्नुभन्दा समूह बनाएर जाँदा लक्ष्य भेट्न सहज हुने उनको तर्क थियो । तमुहरूको भाषा, संस्कार, संस्कति जगेर्ना गर्नका लागि एकता आवश्यक रहेको उनले बताए । यसमा तमु ह्युल छोंज धिं गुरूङ राष्ट्रिय परिषद्ले सराहनीय काम गरेको उनको भनाइ थियो । आगामी दिनमा पनि रचनात्मक काम गर्दै तमु जातिको अस्तित्व कायम गर्न भूमिका खेल्नुपर्नेमा उनले जोड दिए ।
अजदेखि सुरु भएको भेला आइतबार सकिने तमु ह्युल छोंज धिं गुरुङ राष्ट्रिय परिषद्का अध्यक्ष कर्णबहादुर गुरुङले जानकारी दिए । केन्द्रीय पार्षद सभामा गरुङ जातिको सामाजिक, सांस्कृतिक, आर्थिक र राजनीतिक अधिकारका विषयमा छलफल हुने अध्यक्ष गुरुङले जानकारी दिए ।
‘तमु भाषालाई सरकारी कामकाजको भाषा हाम्रो आह्वान, तमु भाषामा तमु थातथलोको नाम पुनःस्थापना र ऐतिहासिक पहिचानको संरक्षण हाम्रो अभियान’ नारासहित आयोजना भएको भेलामा देशभरबाट गरी छ सय प्रतिनिधिको सहभागिता रहेको महासचिव डम्बर गुरुङले बताए ।
