काठमाडौँ– नेपाली राष्ट्रिय महिला फुटबल टोलीका मुख्य प्रशिक्षक अनन्तराज थापाले पेरिस ओलम्पिक महिला एशिया छनोट अन्तर्गत पहिलो चरणको खेलमा नेपालले पाहुना टोली भियतनामसँग सुखद् नतिजाका लागि खेल्ने बताएका छन् ।
मंगलवार अखिल नेपाल फुटबल संघ (एन्फा) मुख्यालयमा आयोजना भएको खेलअघिको पत्रकार सम्मेलनलाई सम्बोधन गर्दै मुख्य प्रशिक्षक थापाले फिफा वरियतामा नेपालभन्दा निकै माथि रहेको टोलीबिरुद्ध राम्रो प्रदर्शन गर्दै सुखद् नतिजाका लागि खेल्ने उनले बताए ।
बलियो टोलीबिरुद्ध खेल्दा अनुभवी खेलाडीद्वय गीता राना र प्रिती राई चोटका कारण मैदानबाहिर रहेपनि टोलीमा अन्य राम्रा खेलाडी भएको र उनीहरुको अनुपस्थितिमा पनि टोलीले राम्रो खेल्ने प्रशिक्षक थापाको भनाइ छ ।
पछिल्लो पटक भारतसँगको मैत्रिपूर्ण खेलमा हासिल गरेको उपलब्धिले टोलीमा खेलाडीलाई निकै सकारात्मक वातावरण मिलेको र उक्त खेलबाट टोलीको सबल र दुर्बल दुवै पक्ष निर्धारण भइ सुधार्ने प्रयास गरेको प्रशिक्षका थापाले बताए । भियतनामसँग हुने दुई खेलबाट नेपाली टोली राम्रो टोलीका रुपमा प्रमाणित गर्ने अवसर भएको समेत प्रशिक्षक थापाले थपे ।
यस्तै नेपाली टोलीकी कप्तान तथा गोलकिपर एञ्जिला तुम्बाप्पो सुब्बाले पहिलो पटक प्रतिष्पर्धा गर्न लागेको टोली भियतनामसँग प्रशिक्षकले भनेजस्तै अन्तिम सयमसम्म सुखद् नतिजा निकाल्ने प्रयास गर्ने बताइन् । कप्तान एञ्जिलाले फुटबल अनिश्चित खेल भएको र यसअघि पनि ओलम्पिक खेलमा बलियो म्यानमारबिरुद्ध खेल्दा बराबरी खेलेको स्मरण गर्दैै राम्रो खेल्ने वाचा गरिन् ।
फिफा वरियतामा माथिल्लो स्थानमा रहेपनि फुटबलमा असम्भव नहुने भन्दै एञ्जिलाले अन्तिम समयसम्म सुखद् नतिजाका लागि खेल्ने बताएकी हुन् । घरेलु मैदानमा आयोजना हुने खेलमा आफ्नो टोली जितका लागि नै खेल्ने उनको भनाइ छ ।
फिफा विश्व वरियताको ३३ औं स्थानमा रहेको भियतनामले नेपालमा हुन लागेको छनोट खेलका दुई खेलमा सुखद् नतिजा निकाल्नका लागि आएको बताएको छ । खेलअघिको पत्रकार सम्मेलनमा भियतनाम टोलीकी कप्तान हुइङ निङले नेपालबिरुद्ध हुने खेलमा जित निकाल्ने लक्ष्यका साथ भ्रमण गरेको बताइन् । प्रतिष्पर्धा गर्ने टोलीको वरियता जुन कुनै अवस्थामा रहेपनि सम्मान गर्दै खेल्ने कप्तान हुइङ निङको भनाइ छ ।
प्रशिक्षक माइ डक चुङले लामो यात्रापछि नेपालमा आएर फुटबल खेल्नका लागि आफ्नो टोली उत्साहित भएको धारणा राखे । नेपाली टोलीसँग यसअघि कहिल्यै पनि नखेलेको तर राम्रो खेल्ने सुनेको भन्दै घरेलु टोलीबिरुद्ध जित निकै महत्वपूर्ण हुने उनको भनाइ छ । नेपाली टोलीमा स्ट्राइकर सावित्रा भण्डारी राम्रो रहेको सुनेको र उनलाई रोक्दै खेल्ने रणनीति बनाएको समेत प्रशिक्षक चुङले बताए ।
नेपालमा आयोजना हुन लागेको छनोट खेलका लागि सोमवार पाहुना टोली भियतनाम नेपाल आइपुगेको छ । नेपाल र भियतनाम सम्मिलित टोलीमा प्यालेस्टाइन र अफगानिस्तान रहेपनि अन्तिम समयमा दुई टोलीले आन्तरिक कारण देखाउँदै नाम फिर्ता लिएपछि दुई टोलीबीच मात्र प्रतिष्पर्धा हुन लागेको हो ।
छनोट अन्तर्गत समूह सीमा नेपाल र भियतनामले प्रतिष्पर्धा गर्न लागेका हुन् । छनोट खेल त्रिपुरेश्वरस्थित दशरथ रंगशालामा हुनेछन् । पहिलो खेल नेपालले भियतनाम चैत २२ र २५ गते खेल्नेछ । दुवै खेल साँझ ६ बजेबाट हुनेछन् । छनोटको शीर्ष टोलीले दोस्रो चरणमा स्थान बनाउनेछ ।
