काठमाडौँ– नेपाली काँग्रेसका नेता प्रकाशमान सिंहले समाज र नागरिकहरुलाई सभ्य बनाउन खेलाडीहरु अनुशासित हुन आवश्यक रहेको बताएका छन् ।
मंगलवारबाट काठमाडौंमा शुरु भएको वीर गणेशमान सिंह राष्ट्रिय बक्सिङ च्याम्पियनसिप, २०२३ लाई सम्बोधन गर्दै उनले यस्तो बताएका हुन् ।
नेता सिंहले जुनसुकै विधाका खेलाडीहरु पनि अनुशासित भएर खेलमा प्रश्तुत हुँदा उनीहरुका गतिविधिले समाज परिवर्तन गर्न र सभ्य समाजको निर्माण गर्न सहयोग पुग्ने धारणा राखे । खेलाडीहरुबाट अनुशासित नागरिक उत्पादन गर्न सकिने भन्दै उनले खेलले स्वस्थ बनाउने मात्रै नभइ समाज सभ्य राख्न महत्वपूर्ण भुमिका खेल्ने बताए ।
‘खेलाडीहरु जुनसुकै विधाका किन नहुन्, फुटबल, क्रिकेट, भलिबल, ब्यामिन्टन, टेबलटेनिस सबै किसिमका खेलाडीहरुले नेपाली नागरिकलाई असल नागरिक बनाउनमा खेलाडीहरु अनुशासित हुनुपर्छ । खेलाडीहरुबाट अनुशासित नागरिक उत्पादन गर्न सकिन्छ, यसलाई मध्यनजर गरेर हामी अघि बढ्नुपर्छ,’ नेता सिंहले भने ।
नेता सिंहले वीर गणेशमान सिंह राष्ट्रिय बक्सिङ च्याम्पियनसिप खेलाडीहरु उत्पादन स्थल भएको र यस प्रतियोगिता खेलाडीहरुका लागि पनि राष्ट्रियस्तरमा छनोट हुने माध्यम बन्ने धारणा राखे ।
