काठमाडौं –नयाँ वर्ष अर्थात १ वैशाखमा एकैपटक ४ वटा फिल्म आउने भएका छन् । ‘जारी’, ‘बिहे पास’, ‘बुलाकी’ र ‘नाइँ नभन्नु ल ६’ १ वौशखमा आउन लागेका हुन् ।
एउटै मितिमा चार फिल्म रिलिज हुँदा व्यावसायिक प्रभाव पर्ने देखिएको छ भने नयाँ वर्षमा बिदा समेत परेकोले फिल्मले धेरै व्यापार गर्ने अपेक्षा ४ वटै फिल्मकै निर्माताको छ ।
फिल्म ‘जारी’ उपेन्द्र सुब्बाको लेखन तथा निर्देशन रहेको फिल्म हो । फिल्म लिम्बू समुदायमा विद्यमान जारी प्रथा र त्यसको सामाजिक आयामको कथावस्तुमाथि निर्माण भएको हो । फिल्ममा दयाहाङ राई, मिरुना मगर, रोयदीप श्रेष्ठ, रेखा लिम्बु, प्रेम सुब्बा, विजय बराल, अनिल सुब्बा, पुष्कर गुरुङ लगायतको अभिनय छ ।
त्यस्तै ‘नाइँ नभन्नु ल ६’ विकासराज आचार्य निर्देशित फिल्म हो । फिल्ममा आँचल शर्मा, आशीर्वाद क्षेत्री, प्रियङ्का कार्की र केकी अधिकारी रहेका छन् ।
फिल्म ‘बुलाकी’ लक्ष्मण सुनारले निर्देशन गरेका हुन् । टोपेन्द्र विष्टको निर्माण रहेको फिल्ममा सुरक्षा पन्त, नरेन खड्का र बिराज विष्टको शीर्ष भूमिका छ । कर्णालीको ग्रामीण जीवन, रीतिरिवाज, जारी प्रथा तथा परिवार र सम्बन्धमा आउने उतारचढावलाई फिल्मको मुख्य कथा बनाइएको छ ।
त्यस्तै फिल्म ‘बिहे पास’ प्रवेश पौडेल निर्देशन गरेका छन् । फिल्ममा दयाहाङ राई र प्रकृति श्रेष्ठको अभिनय रहेको छ ।
