काठमाडौँ- जारी १६ औँ संस्करणको इन्डियन प्रिमियर लिग (आइपिएल) क्रिकेटमा शतप्रतिशत जित निकाल्ने क्रममा पञ्जाब किंग्लसले राजस्तान रोयल्सलाई हराएको छ ।
गएराति लगातार दोस्रो जित निकाल्ने क्रममा पञ्जाबले राजस्थानलाई ५ रनले पाखा लगाएको हो ।
गुवाहाटीमा भएको खेलमा पञ्जाबले दिएको १९८ रनको लक्ष्य पछ्याएको राजस्थानले २० ओभरमा ७ विकेट गुमाउँदै १९२ रनमात्र बनाउनसक्यो ।
राजस्थानका कप्तान सन्जु सामसनले २५ बलमा ५ चौका र १ छक्कासहित सर्वाधिक ४२ रन बनाए ।
यस्तै, सिम्रोन हेटमायर १८ बलमा ३६ रन जोडे ।
पञ्जाबका तीव्र गतिका बलर नाथन एलिसले ४ ओभरमा ३० रन खर्चेर ४ विकेट लिए । यस्तै अर्शदीप सिंहले २ विकेट हात पारे ।
त्यसअघि टस हारेर पहिला ब्याटिङको गरेको पञ्जाबले २० ओभरमा ४ विकेट गुमाउँदै १९७ रन बनाएको थियो ।
पञ्जाबका लागि कप्तान ओपनरद्वय शिखर धवन र प्रभसिमरन सिंहले अर्धशतकीय पारी खेले । धवनले ८६ रनको अविजित पारी खेल्दा अर्का सिंह ६० रनमा आउट भए ।
राजस्थानका जेसन होल्डरले सर्वाधिक २ विकेट लिए ।
जारी लिगमा पञ्जाबले २ खेल खेल्दा शतप्रतिशत जितको नतिजा निकालेको छ । पञ्जाब ४ अंकका साथ १० टोली सहभागी लिगको दोस्रो स्थानमा रहेको छ ।
दोस्रो खेलमा पहिलो हार व्यहोरेको राजस्थान भने २ अंकसहित चौथो स्थानमा रहेको छ ।
