काठमाडौं –चीनका अनुसन्धानकर्ताहरूको टोलीले सुरुमा कोरोना पत्ता लागेको वुहानबाट तीन वर्षअघि लिइएका नमूनाहरूको विश्लेषण प्रकाशित गरेको छ । 

वुहान सहरको हुआनान समुद्री खाना तथा वन्यजन्तु बजार कोरोना भाइरसको उत्पत्तिबारे खोज गर्ने अनुसन्धानको केन्द्रमा रहेको छ ।

यसै बजारबाट २०२० मा संकलन गरिएको जैविक प्रमाणको समीक्षासहितको खोज अध्ययन सार्वजनिक नेचर जर्नलमा सार्वजनिक भएको हो । सार्वजनिक हुनुअघि यो अध्ययनलाई अन्य वैज्ञानिकहरूले पनि प्रमाणित गरेका छन् ।

यसले हुआनान समुद्री खाना तथा वन्यजन्तु बजारमा बेचिएका जनावरहरूबाट कोराना भाइरस फैलिएको हुनसक्नेतर्फ पनि यसको उत्पत्तिको अनुसन्धानलाई मोड्नसक्ने देखिएको छ ।

यो अनुसन्धानले कोरोना भाइरसको लागि पोजेटिभ देखिएका स्वावहरूमा जंगली जनावरहरूको आनुवंशिक सामग्री पनि भेटिएको देखिएको छ ।

यसलाई आधार मान्दै केही वैज्ञानिकहरूले कोभिड–१९ सुरुमा संक्रमित जनावरबाट मानिसमा सरेको प्रमाण हुनसक्ने टिप्पणी समेत गरेका छन् । तर, अरूले नतिजाहरूको व्याख्या गर्न सावधानी अपनाउन आग्रह गरेका छन् ।

संकलन गरिएका नमुनाहरूको आनुवंशिक सामग्री सार्वजनिक गर्न तीन वर्ष किन लाग्यो भन्ने कुरा स्पष्ट छैन । चिनियाँ अनुसन्धान टोलीले २०२२ को फेब्रुअरीमा आफ्नो अध्ययनको प्रारम्भिक संस्करण अनलाइनमा पोस्ट गरेको थियो । तर, त्यतिबेला वुहानको बजारबाट संकलन गरिएका नमुनाहरूको पूर्ण आनुवंशिक जानकारी सार्वजनिक गरिएको थिएन ।

यसमा समावेश गरिएका नमुनाहरू बजार भित्रका स्टल, भुँइ, पिजरा र मेसिनरीहरूबाट संकलन गरिएको थियो । चिनियाँ अनुसन्धानकर्ताहरूले संक्रमित जनावरबाट मानिसमा कोरोना भाइरसको संक्रमण फैलिएको हो भन्न नसकिने बताएका छन् ।

उनीहरूले संक्रमित मानिसबाट नै पनि बजारका जनावर र अन्य मानिसमा संक्रमण फैलिएको हुनसक्ने बताएका छन् । यसअघि वुहानको प्रयोगशालाबाट कोरोना भाइरस फैलिएको आशंकाको तथ्यसमेत खोजको विषय बनेको थियो ।