विराटनगर–त्रिभुवन आर्मी क्लब, नेपाल पुलिस, सुदूरपश्चिम र मधेस प्रदेश गिरिजाप्रसाद कोइराला स्मृति चौथो राष्ट्रिय पुरुष हक्की प्रतियोगिताको सेमिफाइनलमा पुगेका छन् ।

प्रतियोगिता अन्तर्गत शनिबार लिग चरणका खेलको सबै समीकरण पूरा भएको छ । लिग खेलको अंक तालिकाका आधारमा समूह ‘ए’ तर्फ आर्मी पहिलो र दोस्रो स्थानमा पुलिस रहेको छ ।

समूह ‘बि’ तर्फ पहिलो सुदूरपश्चिम र दोस्रो मधेस प्रदेश रहेका छन् । आइतबार हुने सेमिफाइनलको पहिलो खेल आर्मी र मधेस प्रदेश तथा दोस्रो खेल सुदूरपश्चिम र पुलिस क्लबबीच हुनेछ ।

शनिबारको पहिलो खेलमा सुदूरपश्चिमले मधेस प्रदेशलाई ५–३ गोलमा हरायो । म्यान अफ द म्याच सुदूरपश्चिमका महेश नेपाली भए ।

त्यस्तै, अर्को खेलमा गण्डकी र कर्णाली प्रदेशले २–२ गोलको बराबरी खेल्दै लिग चरणबाट बाहिरिए । गण्डकीका संगम जेटी र असिम बाहेकले गोल गरे भने म्यान अफ द म्याच कर्णालीका जीवन राउतले २ गोल गरे ।

त्यस्तै, शुक्रबार राति भएको खेलमा साबिक विजेता त्रिभुवन आर्मीले पूर्व विजेता गण्डकी प्रदेशलाई ८–१ को फराकिलो गोल संख्यामा पराजित ग¥यो । म्यान अफ द म्याच आर्मीका नितिश न्यौपाने भए ।