काठमाडौँ– इन्डियन प्रिमियर लिग (आइपिएल) क्रिकेटमा मुम्बई इन्डियन्सले पहिलो जित निकालेको छ ।
मुम्बईले घरेलु टोली दिल्लीलाई ६ विकेटले पराजित गर्दै जारी लिगमा पहिलो जित निकालेको हो ।
अरुण जेट्ली रंगशालामा भएको खेलमा दिल्लीले दिएको १७३ रनको लक्ष्य मुम्बईले अन्तिम बलमा ४ विकेट गुमाएर पूरा गर्यो ।
मुम्बईका लागि कप्तान तथा ओपनर रोहित शर्माले ६५ रनको अर्धशतकीय पारी खेले ।
यस्तै तिलक बर्माले ४१, इशान किशनले ३१, क्यामेरुन ग्रिनले अविजित १७ तथा टिम डेभिडले अविजित १३ रन बनाए ।
दिल्लीका लागि मुकेश कुमारले सर्वाधिक २ विकेट लिए ।
त्यसअघि टस हारेर पहिला ब्याटिङ गरेको दिल्लीले १९.४ ओभरमा सबै विकेट गुमाएर १७२ रन बनाएको थियो ।
दिल्लीका लागि ओपनर तथा कप्तान डेविड वार्नरले ५१ रनको अर्धशतकीय पारी खेलेका थिए ।
मुम्बईका लागि पियुष चावला र जेशन बेरेनडर्फले समान ३÷३ विकेट लिए । रिली मिरिडेथ २ तथा ऋतिक शोकिनले १ विकेट लिए ।
जारी प्रतियोगितामा ३ खेल खेल्दा मुम्बईको यो पहिलो जित हो ।
यता, दिल्ली भने ४ खेल्दा जितविहीन छ ।
मुम्बई २ अंकका साथ १० टोली सहभागी लिगको आठौं स्थानमा रहेको छ ।
चार खेलमा अंकविहीनन रहेको दिल्ली पुछारमा छ ।
