काठमाडौं –सेन्ट्रल एसियन भलिबल एसोसिएसन (काभा) महिला भलिबल च्यालेन्ज कपको समूह चरणमा नेपालले भारतसँग प्रतिस्पर्धा गर्ने भएको छ । मंगलबार राति भएको ‘ड्र’अनुसार नेपाल र भारत एकै समूहमा परेका हुन् ।
काठमाडौँको त्रिपुरेश्वरस्थित राष्ट्रिय खेलकुद परिषद् (राखेप)को कभर्ड हलमा हुने प्रतियोगितामा आठ टोलीले प्रतिस्पर्धा गर्नेछन् । आठ टोलीलाई दुई समूहमा विभाजन गरिएको छ । जेठ ६ देखि १५ गतेसम्म हुने प्रतियोगितामा समूह ‘ए’मा नेपाल भारतसँगै बंगलादेश र कीर्गिस्तान छन् । समूह ‘बी’मा उज्वेकिस्तान, श्रीलंका, काजकिस्तान र माल्दिभ्स छन् ।
दक्षिण एसियाको च्याम्पियन भारतले पहिलोपटक यस प्रतियोगिता खेल्न लागेको हो । नेपालले भने दुई पटक यस प्रतियोगिताको उपाधि जितिसकेको छ । भारतको उपस्थितिसँगै नेपाललाई उपाधि रक्षा गर्न कडा चुनौती थपिएको छ ।
नेपाल र भारत पछिल्लोपटक २०१९ मा नेपालमै सम्पन्न १३औँ दक्षिण एसियाली खेलकुद (साग)को महिला भलिबल फाइनलमा प्रतिस्पर्धा गरेका थिए । उक्त खेलमा नेपाल ३–२ ले पराजित भएको थियो । नेपालकी कप्तान अरुणा शाहीले यस प्रतियोगितामा उक्त हारको बदला लिने अवसर रहेको बताएकी छिन् ।
