साविक विजेता गुजरातको तेस्रो जित, पञ्जाबको दोस्रो हार

काठमाडौँ– १६ औँ संस्करणको इन्डियन प्रिमियर लिग (आइपिएल)मा साविक विजेता गुजरात टाइटन्सले तेस्रो जित निकालेको छ ।

पञ्जाब किंग्सलाई ६ विकेटले पराजित गर्दै गुजरातले आफ्नो चौथो खेलमा तेस्रो जित हात पारेको हो ।
गएराति मोहालीस्थित बिन्द्रा स्टेडियममा घरेलु टोली पञ्जाबले दिएको १५४ रनको लक्ष्य गुजरातले १ बल बाँकी छँदै ४ विकेटको क्षतिमा पूरा गर्यो ।

गुजरातका लागि ओपनर शुभमन गिलले ४९ बलमा ७ चौका र १ छक्कासहित ६७ रनको अर्धशतकीय पारी खेले । अर्का ओपनर ऋद्धिमान शाह ३० रनमा आउट भए । 

यस्तै, साई सुदर्शनले १९ रन बनाएर आउट हुँदा डेविड मिलर १७ रनमा अविजित रहे ।

यसैगरी, कप्तान हार्दिक पाण्ड्याले ८ तथा राहुल ताबेतियाले अविजित ५ रन जोडेपछि गुजरातले लक्ष्य भेट्टायो । 

पञ्जाबका लागि साम करन, अर्शदीपसिंह, हरप्रित ब्रार र कागिसो रबाडाले समान १÷१ विकेट लिए ।

त्यसअघि टस हारेर पहिला ब्याटिङको गरेको पञ्जाबले २० ओभरमा ८ विकेट गुमाउँदै १५३ रन बनाएको थियो । 

पञ्जाबका म्याथ्यू शर्टले २४ बलमा सर्वाधि ३६ रन बनाएका थिए ।

गुजरातका लागि मोहित शर्माले २ तथा मोहम्मद शामी, जोशुवा लिटिल, अल्जारी जोशेफ र राशिद खानले समान १÷१ विकेट लिए ।

गुजरातले ४ खेल खेल्दा ३ मा जित र १ मा हार ब्यहोरेको छ । १० टोली सम्मिलित प्रतियोगितामा उ ६ अंकसहित तेस्रो स्थानमा छ । 

पञ्जाब ४ खेलमा २ मा जित र २ मा हारसहित ४ अंकका साथ छैटौँ स्थानमा रहेको छ ।