काठमाडौँ– प्रधानमन्त्री पुष्पकमल दाहाल प्रचण्डसहित नेकपा (माओवादी केन्द्र)का मन्त्रीहरूले आजदेखि नेता र कार्यकर्ता पार्टी कार्यालयबाट मात्रै भेट्ने भएका छन् । 

नयाँ वर्ष २०८० देखि पार्टी कार्यालयमै भेट्ने व्यवस्था गर्ने निर्णय यसअघि माओवादी केन्द्रले गरेकोमा त्यो आज लागू भएको हो । 

प्रधानमन्त्रीसहित मन्त्रीले पार्टी नेता र कार्यकर्ता भेट्न दिउँसो ४ बजेदेखि साँझ ६ बजेसम्मको समय व्यवस्था गरिएको बताइएको छ । यसका लागि माओवादी केन्द्रका अध्यक्षसमेत रहेका प्रचण्ड बिहान ८ बजे नै पार्टी कार्यालय पुगिसकेको उनको सचिवालयले जनाएको छ । 

पार्टीका प्रमुख सचेतक हितराज पाण्डेका अनुसार माओवादी केन्द्रले पार्टी अध्यक्ष एवम् प्रधानमन्त्री प्रचण्डको परामर्शमा यस्तो नीति ल्याइएको हो । मंगलबार दिउँसो बसेको माओवादी संसदीय दलको बैठकले प्रधानमन्त्रीसहित मन्त्रीले भेट्ने समय कार्यतालिका निर्धारण गरेर निर्णय गरिएको उनले बताए ।

प्रधानमन्त्री निवाससहित प्रधानमन्त्री कार्यालय र मन्त्रालयमा अत्यन्तै भिडभाड हुन थालेपछि नेता र कार्यकर्ता भेट्न पार्टी केन्द्रीय कार्यालय पेरिसडाँडाबाट मात्रै व्यवस्था गरिएको बताइएको छ ।

माओवादी केन्द्रले बिहान १० बजेदेखि २ बजेसम्म मन्त्रालयको काम कारबाहीमा समय दिने, दिउँसो ४ बजेदेखि साँझ ६ बजेसम्म पार्टी नेता–कार्यकर्तालाई भेट्न समय दिनुपर्ने तालिका बनाएको छ ।

त्यसपछिको समय निमन्त्रणा गरिएका संघ–संस्थाका व्यक्तिलाई भेट्ने कार्यतालिका छ ।