काठमाडौँ– भारतमा जारी १६ औँ संस्करणको इन्डियन प्रिमियर लिग (आइपिएल) क्रिकेटमा सनराईजर्स हैदराबादले लगातार दोस्रो जित हात पारेको छ ।
गएराति इडन गार्डेनमा भएको खेलमा हैदराबादले घरेलु टोली कोलकाता नाइट राइडर्सलाई २३ रनले पराजित गर्दै चौथो खेलमा लगातार दोस्रो जित हात पारेको हो ।
हैदराबादले दिएको २२९ रनको विशाल लक्ष्य पछ्याएको कोलकाताले २० ओभरमा ७ विकेट गुमाउँदै २०५ रनमात्र बनायो ।
कोलकाताका कप्तान नितिश राणा र रिंकु सिंहले अर्धशतक पारी खेले पनि त्यो टोलीको जितका लागि पर्याप्त भएन ।
राणाले ४१ बलमा ५ चौका र ६ छक्कासहित ७५ रनको बनाएर आउट हुँदा सिंह ३१ बलमा ४ चौका र ४ छक्कासहित ५८ रनमा अविजित रहे ।
हैदराबादका लागि मार्को जनसन र मायांक मारकान्डेले समान २–२ विकेट लिए । ।
यस्तै, भुवनेश्वर कुमार, टी नटराजन र उमरान मलिकले समान १–१ विकेट लिए ।
त्यसअघि टस हारेर पहिले ब्याटिङ गरेको हैदराबादले २० ओभरमा ४ विकेट गुमाएर २२८ रन बनाएको थियो ।
हैदराबादका लागि ओपनर ह्यारी ब्रुकले १२ चौका र ३ छक्कासहित अविजित १०० रनको शतकीय पारी खेले । प्लेयर अफ दी म्याच चुनिएका ह्यारीले ५५ बलमा आफ्नो शतक पूरा गरेका थिए ।
यस्तै, कप्तान एडेन माक्ररमले २६ बलमा २ चौका र ५ छक्काको सहयोगमा ५० रनको अर्धशतकीय पारी खेले ।
यसैगरी, अभिषेक शर्माले ३२ तथा हेनरिक क्लासेनले ६ बलमा अविजित १६ रनमा बनाए ।
कोलकाताका लागि आन्द्रे रसलले सर्वाधिक ३ विकेट लिए ।
चौथो खेलमा दोस्रो जित निकाले हैदराबाद १० टोली सहभागी लिगको सातौँ स्थानमा रहेको छ ।
चौथो खेलमा दोस्रो हार व्यहोरेको कोलकाता ४ अंकका साथ चौथो स्थानमा रहेको छ । हारका बाबजुद कोलकाता हैदराबादभन्दा अगाडि छ । समान ४ अंक भए पनि कोलकाता रनरेटमा अगाडि भएको हो ।
