काठमाडौं– प्रधानमन्त्री पुष्पकमल दाहाल ‘प्रचण्ड’ले नेपाली कांग्रेसलाई बाँकी रहेका मन्त्रीहरूको नाम दिन आग्रह गरेका छन् ।
बालुवाटारमा शनिबार सत्ता गठबन्धनका ३ शीर्ष नेताहरूबीच भएको बैठकमा प्रधानमन्त्री प्रचण्डले कांग्रेसका भागमा परेका ४ मन्त्रीको नाम दिन सभापति शेरबहादुर देउवासँग आग्रह गरेका हुन् ।
कांग्रेसको भागमा परेका ८ मध्ये ४ वटा मन्त्रालयमा मन्त्रीको नाम पठाउन सकेको छैन ।
कांग्रेसभित्रको आन्तरिक किचलोले गर्दा सभापति देउवालाई मन्त्रीको नाम पठाउन ढिलाई भएको हो ।
कांग्रेसले स्वास्थ्य, परराष्ट्र, न्याय र खेलकुद मन्त्रालयमा मन्त्री पठाउन बाँकी छ ।
कांग्रेसले नाम दिए आइतबारसम्म मन्त्रिपरिषद् पूर्णता दिने प्रधानमन्त्रीको तयारी छ ।
प्रधानमन्त्रीको काँधमा अहिले पनि ६ वटा मन्त्रालय छन् । त्यसमध्ये ४ मन्त्रालय कांग्रेस, एक जसपा र एक प्रभु साह वा अमरेशकुमार सिंहमध्येबाट मन्त्री बनाउने उनको तयारी छ ।
कोइराला समूहले तीन मन्त्रालयमा दाबी गरेको छ । तर, देउवाले दुई वटा मन्त्रालय दिने अडानमा छन् ।
सभापति देउवाले उपप्रधानमन्त्रीसहित रक्षामा उपसभापति पूर्णबहादुर खड्का, अर्थमा प्रवक्ता डा. प्रकाशशरण महत, शहरी विकासमा सीता गुरुङ र उद्योग वाणिज्य तथा आपूर्ति मन्त्रालयमा रमेश रिजाललाई पठाएका छन् ।
यस्तै जनता समाजवादी पार्टीले पाएको दुईमध्ये शिक्षा मन्त्रालयमा अशोक राईलाई पठाए पनि एक मन्त्रालयमा मन्त्री पठाउन बाँकी छ । जसपाले आफूले पाएको वन तथा वातावरण मन्त्रालयमा मन्त्रीको नाम दिन सकेको छैन । यस्तै जनमत पार्टीले छोडेको खानेपानी मन्त्रालय पनि रिक्त छ ।
