काठमाडौं– काठमाडौं उपत्यका खानेपानी लिमिटेड (केयूकेएल)ले मेलम्चीको पानी दैनिक १२ करोड लिटर उपभोक्तालाई वितरण गर्न थालेको छ ।
मेलम्ची नदीबाट दैनिक १७ करोड लिटर पानी ल्याइएको छ । त्यसमध्ये दैनिक पाँच करोड लिटर पानी पाइप परीक्षणका लागि र बाँकी उपभोक्ताको घरघरमा वितरण भइरहेको जनाइएको छ ।
दैनिक १२ करोड लिटर पानी उपभोक्ताले प्रयोग गरिरहको लिमिटेडका प्रमुख कार्यकारी निर्देशक मिलन शाक्यले जानकारी दिए । बाँकी पानी कति क्षेत्रफलमा परीक्षण गर्ने सोही आधारमा खपत हुने उनले बताए ।
प्रमुख शाक्यले भने, ‘परीक्षणका लागि प्रयोग भएको बाहेक पानी उपभोक्ताको धारामा पठाइएका छौँ ।’
उपभोक्ताको घरमा दुई दिनको फरकमा पानी वितरण गरिरहेको लिमिटेडले जनाएको छ ।
‘कुनै क्षेत्रमा पानी राम्रो आइरहेको छ भने कतै राम्रो नआएको गुनासो आइरहेको छ । पानी नपुगेका र धाराबाट कम झर्ने ठाउँमा पुगेर समस्या समाधान गर्दै पानी पठाइरहेका छौँ’, उनले भने ।
पहिले भित्री बस्तीमा पानी नआउने भनी गुनासो आएकामा अहिले त्यो समस्या समाधान गरी नियमित पानी वितरण गरिएको प्रमुख शाक्यको भनाइ छ ।
मुख्य लाइनबाट भित्र भने पानीको पाइप उपभोक्तको घरसम्म नपुगेकाले वितरण हुन नसकेको उनले बताए । केही ठाउँमा धारा बिग्रिएको, जाम भएको वा बीचमा छुट्टिएको गुनासो आएकाले मर्मत गरी नयाँ पाइप जडानपश्चात् पानी वितरणको तयारी भइरहेको प्रमुख शाक्यले जानकारी दिए ।
उनले भने, ‘क्षेत्रगत समस्या अहिले छैन । कुनैकुनै घरमा भने अझै समस्या हुनसक्छ । समाधान गरेर पानी नियमित वितरणका लागि काम गर्नेछौँ ।’
उनका अनुसार भक्तपुर नगरपालिकाका विभिन्न स्थानबाट गुनासो आइरहेको छ । लिमिटेड र नगरपालिकाबीच समाधानका लागि समझदारीपत्रमा हस्ताक्षर भएको थियो । नगरपालिकाले पाइपका निम्ति खन्ने र पुर्ने कामका लागि खर्च व्यहोर्ने र लिमिटेडले पाइप तथा आवश्यक अरू सामग्रीको खर्च व्यहोर्ने गरी सहकार्य भएको प्रमुख शाक्यले बताए ।
यस आर्थिक वर्षमा गएको पुसदेखि उपत्यकामा मेलम्चीको पानी वितरण सुरु भएको हो । हिउँदको समयमा उपत्यकामा खानेपानीको समस्या हुने गरेकामा मेलम्चीको पानी आउन थालेपछि उपत्यकावासीलाई सहज भएको छ ।
