विराटनगर –प्रथम ऋचा मेमोरियल टी – २० क्रिकेट प्रतियोगिताको उपाधि विभागीय टिम त्रिभूवन आर्मीले जितेको छ । विराटनगरमा आइतबार सम्पन्न फाइनल खेलमा घरेलु टिम एनबीएससीलाई ६ विकेटले हराउँदै आर्मीले उपाधि जितेको हो ।
उपाधिसँगै आर्मीले १ लाख ५० हजार रुपैयाँ नगद र ट्रफी जितेको छ । उपबिजेता भएको एनबीएससीले ७५ हजार रुपैयाँ पुरस्कार पाएको छ ।
१ सय ११ रनको विजय लक्ष्य पछ्याएको आर्मीले ११ दशमलव ३ ओभरमा ४ विकेट गुमाउँदै लक्ष पुरा गरेको हो । आर्मीका सन्दिप रजाली म्यान अफ द म्याच भए ।
यसअघि टस हारेर ब्याटिङ गरेको एनबीएससीले १७ दशलव २ बलमा सबै विकेट गुमाई १ सय १० रन बनाएको थियो । प्रतियोगिताको बेस्ट ब्याटरमा एमबी ग्रुप डडेलधुराका दिपक बोहरा घोषित भए । यस्तै प्लेयर अफ सिरीज दिल्ली युनाइटेडका साकेत केडिया भए । उनले ५० हजार मूल्य बराबरको क्रिकेट किड पाए । बेस्ट बलर आर्मीका जितेन्द्र मुखिया घोषित भए ।
विराटनगरमा चैत २७ देखि वैशाख ३ गतेसम्म आयोजित प्रतियोगितामा मुलुकका तीन विभागीय टोली त्रिभुवन आर्मी, नेपाल प्रहरी र एपीएफसहित एनबीएससी विराटनगर, राहुल ११, सुदुरपश्चिम क्रिकेट क्लब, भारतको नरपथगन्ज र दिल्ली युनाईटेड गरी ८ वटा टिम सहभागी थिए ।
