काठमाडौँ– छतबाट खसेर गम्भीर घाइते भएका राष्ट्रिय स्वतन्त्र पार्टीका सभापति रवि लामिछानेका सवारी चालक शम्भु भनिने दिलबहादुर थापा आज बारा जाँदै थिए ।

लामिछानेलाई लिएर थापा आइतबार तनहुँको दमौली पुगेका थिए । त्यसपछि आएर उनी रास्वपाका महामन्त्री मुकुल ढकालका सवारी चालक कालुराम राजवंशीसँगै चितवनस्थित घरको छतमा सुतेका थिए । 

आज बिहान भरतपुरकै घरदैलो कार्यक्रमपछि थापा बारा जाने कार्यक्रम रहेकोमा उनी छतबाट खसेर गम्भीर घाइते हुन पुगेका छन् ।

भरतपुर ११ स्थित लामिछानेको घरबाट विहान ४ बजेतिर सिन्धुपाल्चोक बाह्रबिसे नगरपालिका–३ मा घर भएका थापा गम्भीर घाइते भएका हुन् ।

थापाको खुट्टामा र टाउको चोट लागेको जिल्ला प्रहरी कार्यलय चितवनले जनाएको छ ।

उनको पुरानो मेडिकल कलेज भरतपुरमा उपचार भइरहेको छ ।

यस घटनाबारे अनुसन्धान भइरहेको प्रहरी प्रवक्ता विजयराज पण्डितले बताए ।