काठमाडौँ– एसिसी प्रिमियर कप क्रिकेट आजदेखि नेपालमा सुरु हुँदैछ । एसिया कपका लागि यो महत्वपूर्ण खुड्किलो हो । यसर्थ, घरेलु टोली नेपाल आज मलेसियाविरुद्ध उत्रँदा जितको छवि कायमै राख्ने लक्ष्यमा हुनेछ । यो प्रतियोगिताको विजेता टोलीले भारत, पाकिस्तानजस्ता ठूला टोलीसँग एसिया कपमा खेल्न पाउँछ । यसकारण यो प्रतियोगिता जित्नेबाहेक नेपालको अन्य लक्ष्य छैन ।
घरेलु टोली नेपाल र मलेसियाबीचको खेल कीर्तिपुरस्थित त्रिवि मैदानमा खेल बिहान ९ः३० बजे सुरु हुनेछ ।
उद्घाटन खेलमै सुखद नतिजा निकाल्ने नेपालको तयारीमा छ । अन्तर्राष्ट्रिय क्रिकेटमा नेपाल मलेसियामाथि सधैँ हाबी छ । यसर्थ, आज पनि नेपाल सदाबहार जितको छवि कायम राख्ने लक्ष्यमा छ । नेपालका लागि मलेसिया तुलनात्मक रूपमा सहज प्रतिद्वन्द्वी रहेको विश्लेषण गरिएको छ ।
नेपाल र मलेसियाबीच यसअघि पाँचवटा अन्तर्राष्ट्रिय खेल भएको छ । जसमा नेपालले सबै खेल जितेको छ ।
खेलअघिको पत्रकार सम्मेलनमा सोमबार कप्तान रोहित पौडेलले नेपालको लक्ष्य प्रिमियर कप जित्दै एसिया कपमा छनोट हुनु रहेको बताए ।
मंगलबार नै मुलपानी मैदानमा हङकङ र सिंगापुरबीच प्रतिस्पर्धा हुँदैछ ।
यस्तो छ नेपाली टोली :
रोहित पौडेन (कप्तान) कुशल भुर्तेल, आसिफ शेख, ज्ञानेन्द्र मल्ल, कुशल मल्ल, आरिफ शेख, सोमपाल कामी, दीपेन्द्रसिंह ऐरी, गुलशन झा, करण केसी, सन्दीप लामिछाने, भीम सार्की, प्रतिश जिसी र ललित राजवंशी ।
वैकल्पिक खेलाडी ः अर्जुन साउद, सन्दीप जोरा, सूर्य तामाङ र किशोर महतो ।
