काठमाडौँ– सरकारले देशभरको जग्गा कित्ताकाट खोल्ने निर्णय गरेको छ। 

मंगलबार साँझ बसेको मन्त्रिपरिषद् बैठकले अर्थतन्त्र चलायमान बनाउन भूउपयोग नियमावली २०७९ लाई संशोधन गर्दै देशभरको जग्गा कित्ताकाट खोल्ने निर्णय गरेको हो । 

अर्थतन्त्र चलायमान हुन नसकेको गुनासो निजी क्षेत्रबाट आएपछि सरकारले जग्गा वर्गीकरणविनै कित्ताकाट गर्न दिने निर्णय गरेको सरकारका प्रवक्ता रेखा शर्माले जानकारी दिइन् ।

‘नियमावली नबनेको कारण घरजग्गा कारोबारमा कित्ताकाट तथा अंशबण्डा रोकिएको थियो। त्यसलाई सहज बनाउनको लागि मन्त्रिपरिषद्ले भू–उपयोग पहिलो संशोधन नियमावली २०७९ स्वीकृति गर्ने निर्णय गरेको छ’ उनले भनिन् ।

यसअघि भूउपयोग नियमावली ल्याएर वर्गीकरण गरेरमात्रै जग्गा कित्ताकाट गर्न पाउने व्यवस्था गरेको थियो । उक्त नियमावली कार्यान्वयनमा आएपछि हालसम्म ५ सय ९२ पालिकामा कित्ताकाट खुलेको थिएन ।