सहकालका देवता मानिने रातो मछिन्द्रनाथको जात्राका लागि रथ बनाउने तयारी सुरु गरिएको छ । ललितपुरको पुल्चोकमा रातो मछिन्द्रनाथको रथ बनाउने तयारी हुँदैछ । शुक्रबारदेखि सुरु हुने जात्रा उपत्यकाकै लामो जात्रा मानिन्छ । करिब २ महिनासम्म चल्ने यस जात्रामा बनाइने रथ ३२ फिट अग्लो तथा लामो हुने गर्छ ।
हरेक वर्ष वैशाख शुक्ल प्रतिपदामा सुरु भई असार शुक्ल चौथीसम्म हुने जात्रामा स्थानीय बाराही जातीले रथ निर्माण गर्नुपर्ने धार्मिक मान्यता छ ।
यस्तै रथ बनाउनका लागि आवश्यक सबै काठ, बेत, बाँस जुटिसकेको छ भने आवश्यक सामग्रीको निर्माण भइरहेको छ ।
मछिन्द्रनाथको जात्रा सम्पन्न गर्न धेरै समुदायको सहभागिता हुन्छ । काठ काट्ने, काठबाट आवश्यक सामग्री बनाउने र रथ बनाउने काम फरक÷फरक जातीको हुने गुठी संस्थानका प्रमुख सैलेन्द्र पौडेलले बताउँछन् ।
मछिन्द्रनाथ छ महिना बुङ्गमति र छ महिना पाटनमा राखिन्छ । वर्षेनी पाटनमा हुँदा विभिन्न जात्रा र पर्व हुनेगर्छन् भने १२ वर्षमा एक पटक बुङ्गमतिमा समेत भव्य रुपमा जात्रा मनाइन्छ । जात्रा मनाउन वर्षभर नै विभिन्न काम भइरहन्छ ।
