काठमाडौं– छातीमा पानी जमेपछि राष्ट्रपति रामचन्द्र पौडेल अहिले भारतमा उपचाररत छन् । बुधबार राष्ट्रपति पौडेललाई श्री एयरलाइन्सको एयर एम्बुलेन्सबाट नयाँ दिल्लीस्थित अल इन्डिया इस्टिच्युट अफ मेडिकल साइन्सेस (एम्स) लगिएको हो ।

छातीमा संक्रमण देखिएपछि त्रिवि शिक्षण अस्पताल महाराजगन्जमा उपचार निगरानीमा रहेका राष्ट्रपति पौडेल सोमबार नियमित फलोअपमा अस्पताल गएका थिए । त्यही दिन छातीमा जमेको पानी निकालेर परीक्षण गरिएको थियो । प्रारम्भिक परीक्षणमा संक्रमणबाहेक अन्य अवस्था सामान्य देखिएको थियो ।

मंगलबार भने राष्ट्रपतिलाई रिंगटा लागेर बेहोस जस्तै भएपछि पुनः अस्पताल भर्ना गरेर चिकित्सकको निगरानीमा राखिएको थियो ।

उनलाई देखिएको संक्रमणको समस्या लामो समयसम्म एन्टिबायोटिक्स सेवन गर्दा पनि निको नभएर थप जटिल बन्दै गएपछि परिवार र चिकित्सकहरुको सल्लाहमा भारत लैजाने निर्णय भएको थियो ।

राष्ट्रपतिमा देखिएको स्पास्थ्य समस्याको निदान नेपालमै सम्भव रहेको वीर अस्पतालका एक वरिष्ठ चिकित्सकले बताएका छन् ।

अस्पतालका वरिष्ठ मिर्गौला रोग विशेषज्ञ प्राडा. अनिल बरालले वीर अस्पतालमा दक्ष जनशक्ति हुँदाहुँदै राष्ट्रपति पौडेललाई उपचारका लागि विदेश किन लगिएको भन्दै प्रश्न गरेका हुन् । 

‘एम्सबाटै छाती रोग विषयमा डीएम उपाधि हासिल गरेका ३ जना वरिष्ठ कन्सल्ट्यान्ट वीर अस्पतालमा कार्यरत हुनुहुन्छ । स्रोत र साधन पनि अहिले राम्रै छन्,’ उनले सामाजिक सञ्जाल ट्व्टिरमा भनेका छन्, ‘के कारणले विदेश लान परेको हो ? देशले थाहा पाउनुपर्ने हैन र ? हामी त सँधै कोही र केही नहुनेलाई मात्र हेर्ने डाक्टर भैयो छ्या !’