काठमाडौँ– नेपालमा जारी एसियाली क्रिकेट परिषद् (एसिसी) प्रिमियर कपमा आज दुई खेल हुँदैछन् ।
काठमाडौँको मुलपानी क्रिकेट मैदानमा हुने खेलमा समूह ‘ए’बाट मलेसिया र साउदी अरेबियाबीच खेल हँुदैछ ।
यस्तै, त्रिवि मैदान, कीर्तिपुरमा हुने समूह ‘बी’को खेलमा सिंगापुर र बहराइन भिड्नेछन् ।
पहिलो खेलमा घरेलु टोली नेपालसँग पराजित भएको मलेसिया दोस्रो खेलमा आज जित निकाल्न चाहन्छ । साउदी अरेबिया भने आज प्रतियोगिताको पहिलो खेल खेल्दैछ ।
यस समूहमा २ अंकका साथ नेपाल शीर्ष स्थानमा र समान २ अंक नै भएको ओमान रनरेटका आधारमा दोस्रो स्थानमा रहेको छ ।
मंगलबार भएको पहिलो खेलमा हङकङसँग पराजित भएको सिंगापुर दोस्रो खेलमा आज पहिलो जित निकाल्न चाहन्छ ।
पहिलो खेल खेल्दै गरेको बहराइन भने जितसहित प्रतियोगिता सुरुवात गर्न चाहन्छ । समूह ‘बी’मा २ अंकका साथ युएई शीर्ष स्थानमा तथा समान अंक नै भएको हङकङ दोस्रो स्थानमा रहेको छ ।
दुवै खेल बिहान ९ बजे सुरु हुने नेपाल क्रिकेट संघ (क्यान)ले जनाएको छ ।
