बारा– नेकपा (एमाले)का अध्यक्ष केपी शर्मा ओलीले जनता समाजवादीका अध्यक्ष तथा सत्ता गठबन्धनको तर्फबाट बारा–२ का उमेदवार उपेन्द्र यादव चुनाव नजित्ने दाबी गरेका छन् ।

‘अलेली नाम सुनेको । थर ठेगाना थाहा नभएको । कहाँको मान्छे चुनाव लड्न आयो, लडेपछि कहाँ जान्छ ?’; उपेन्द्रप्रति कटाक्ष गर्दै ओलीले भने, ‘जित्ने त होइन । चुनाव लड्न आएका लड्छन्, लडेपछि फर्किन्छन् ।’

बिहीबार बारामा आयोजित चुनावीसभालाई सम्बोधन गर्दै ओलीले पार्टीका उम्मेदवार पुरुषोत्तम पौडेल जनताको साथ लिएर आएको र चुनाव जित्ने दाबी गरे । उनले गठबन्धनको कार्यक्रमलाई टुक्रेसभाको संज्ञा दिँदै एमालेको बृहत आमसभा भएको पनि दाबी गरे ।

ओलीले पौडेलले जिते मतदाताले महसुस गर्ने गरी काम गर्ने भन्दै मतदान गर्न आग्रह समेत गरे ।

ओलीले वर्तमान सरकार केही महिनाभित्रै अब पनि रहने हो भने बृद्धभत्ता रोक्ने निश्चत रहेको बताए ।

विदेशीले समेत नपत्याएको यो सरकारसँग पैसा नै नभएकाले सरकारले दिँदै आएको वृद्धभत्ता रोकिने र प्रहरीलाई कपडा फेर्न समेत नपाउने उनले भने ।

उनले गठबन्धन सरकार नपछारेसम्म देशको विकास नहुने दाबी समेत गरे । उनले गढीमाईमा गठबन्धनका नेताहरू आएर एमालेलाई गाली गर्न मात्रै भएको पनि बताए ।