चितवन–आइतबार हुने उपनिर्वाचनलाई मध्यनजर गर्दै जिल्ला सुरक्षा समिति चितवनले मुख्य राजमार्गसहित जिल्लामा सवारीसाधन चलाउन रोक लगाउने भएको छ ।

यसअघि मुख्य राजमार्गमा लामो दूरीका सवारीसाधनलाई समूहमा सुरक्षाकर्मीले स्कर्टिङसहित कटाउने निर्णय गरेको चितवन प्रशासनले निर्णय बदर गर्दै बिहान ६ बजेदेखि साँझ ६ बजेसम्म राजमार्ग पूर्ण रुपमा बन्द गर्ने निर्णय गरेको चितवनका प्रमुख जिल्ला अधिकारी सुरेन्द्र पौडेलले जानकारी दिए । 

चितवन क्षेत्र २ मा १३८ वटा मतदान केन्द्रमा आइतबार उपनिर्वाचन हुँदैछ ।

प्रमुख जिल्ला अधिकारीका अनुसार राजमार्ग बन्द रहने भएपनि एम्बुलेन्स, दमकलजस्ता अति आवश्यक सवारी साधन चल्नेछ ।

यसका लागि छिमेकी जिल्लालाई पनि सूचना गरिसकिएको प्रशासनले जानकारी दिएको छ । भोलि बिहान ६ बजेअगाडि नै सवारीसाधन यो जिल्लाबाट कटाइसक्न भनिएको छ । 

काठमाडौंबाट चितवन हुँदै जाने सवारीसाधन धादिङमा र काठमाडौं भित्रिने सवारीसाधन मकवानपुरमै रोकिनेछन् । 

मुग्लिनदेखि मादी नदीसम्म पनि बन्द

चुनावका दिन भोलि बिहान मुग्लिनदेखि तनहुँको मादी नदीसम्मको सडकखण्ड पूर्ण रुपमा बन्द गरिने भएको छ । तनहुँ क्षेत्र नं १ मा हुने उपनिर्वाचनका कारण बिहान ५ बजेदेखि साँझ ६ बजेसम्म सडक पूर्ण रुपमा बन्द गरिने तनहुँका प्रमुख जिल्ला अधिकारी छविलाल रिजालले जानकारी दिए ।

सुरक्षा संवेदनशीलताका कारण सडक बन्द गर्नुपरेको रिजालले बताए। दमकल, एम्बुलेन्सलगायत अत्यावश्यकबाहेकका सबै सवारीसाधन ठप्प गरिने भएको छ ।