काठमाडौं –प्रधानमन्त्री एवम् नेकपा (माओवादी केन्द्र) का अध्यक्ष पुष्पकमल दाहालले केही दिनभित्रै समाजवादी मोर्चा गठन गरिने बताएका छन् । प्रधानमन्त्री प्रचण्डले यो मोर्चाले सबैलाई नेकपातिर फर्कन अपिल गर्ने पनि विश्वास दिलाए । उनले नेकपा हिजो एकाध नेताको कारणले दुर्घटनामा परेको भएपनि लाखौं कार्यकर्ता र जनताले अनुमोदन गरेको एकता भएको उल्लेख गरे ।
नेपाल कम्युनिष्ट पार्टी स्थापनाको ७५औं वर्षको अवसरमा नेकपा (एकीकृत समाजवादी) ले आयोजना गरेको नेपाली कम्युनिष्ट आन्दोलन ः उपलब्धि, चूनौति र सम्भावना विषयक विचार गोष्ठीमा सम्बोधन गर्दै प्रधानमन्त्री दाहालले भने,‘त्यो एकता हामीद्वारा प्रस्तावित हो । हामीले अब देशको आवश्यकत्तालाई हेरौं । आग्रह वा पूर्वाग्रहमा नजाऔं ।’ उनले अब विचारात्मक रुपमा आत्मसमीक्षा गर्न जोड दिए ।
‘अहिले माधव कमरेड र हामीहरूसहित थुप्रै नेताहरूसँग जे छलफल भइरहेको छ । हामी भनिरहेका छौं नेकपातिरै फर्किनुपर्छ । कम्युनिष्ट पार्टीमा नेतृत्वलाई कि (चाबी) भन्ने गरिन्छ र हो पनि । नेतृत्वले गलत विचार अगिंकार ग¥यो भने ठूलो क्षति हुन्छ,’ उनले भने ।
देशभक्त कम्युनिष्टहरूलाई राष्ट्रिय स्वाधीनताको सुदृढीकरणका निम्ति हामी एक हुन जरुरी रहेको बताउँदै प्रधानमन्त्री प्रचण्डले भने, ‘आउनुस् बसौं सँगै बिना आग्रह र पूर्वाग्रह समीक्षा गरौं । विचारधारात्मक रूपमा समीक्षा र आत्मसमीक्षा गरौं । राष्ट्रियको हितमा एकताको नयाँ पहल गरौं । त्यसले मात्रै कम्युनिष्ट आन्दोलनमा इमान्दार हुनसक्छौं ।’
